مممممم تشهيت قطايف فقلت والله نديرها ونحط الوصفة لحباباتي في منتدايا الغالي حمصت الكاوكاو مليح وطحنتو عبرت منو تلات عبارات وضفت عليه عبر مشي معمر سكر عادي مع شوية قرفة وخلطت الكل مع بعض شديت مقلة دهنتها بالسمن وحطيت فيها كمية من عجينة القطايف من بعد رشيتها بشوية ماء زهر من بعد حطيت الحشو تع الكاوكاو والي يحب يزيد فوقو حلوة الترك جي هااااايلة انا ما كانتش عندي ونسيت باش نشري من بعد حطيت فوق الحشو قطع صغيرة تع سمن ورشيت بشوية ماء زهر باش ما تنفرقليش الخبزة بعدما تطيب وحطيت فوقها كمية من عجينة القطايف وتان زدت فوقها قطع صغييرة من السمن وفي جوانب المقلة وحطيتها على نار طبعا كي تكوني طيبي حاولي انك دوري المقلة باش تطيب في كل الجوانب بعدما تطيب على هاد الوجه اقلبيا باستعمال طبسي وطيبيها على الجهة التانية حتى تاخد لون دهبي بعدما تطيب حطيها في سنيوة وشربيها وهي سخونة بعسيلة تكوني خففتيها بماء زهر اسقيها في الجوانب مليح وفي الوسط ومين تشوفيها شربت زيديلها شويمن بعد حطيها في صحن التقديم وزينيها حسب رغبتك انا زينتها بشوية كاوكاو بقالي من الحشو وقدميها مع اتاي تاكلوها بالصحة والراحة ما تنسونيش بدعوة خير برك