اقتباس:
المشاركة الأصلية كتبت بواسطة طال الرجاء
سلام عليكم
عزيزاتي نسمة و لمسة طبعا أنا لجأت للحقن المجهري و السبب كيما تعرفوا ضعف الحيوانات المنوية عند زوجي ولما سقسيت مليح دلوني على كلينيك فريال بباب الزوار وقالولي أنها أحسن عيادة عندنا في الجزائر .
ورحت أول زيارة لي في سبتمبر 2013 و خذيت معايا تحاليل الهرمونات ........fsh........lh........tsh.........e2....... prolactin......و راديو تاع قنوات فالوب أو مايسمى أشعة بالصبغة .......وخذيت ثاني تحليل السائل المنوي لزوجي و بعد ماعملولي في المركز تحليل الدم و أظن أنه هرمون الاستراديول و عملي الطبيب راديو أو سونلر مهبلي دخلنا عندو أنا وزوجي وقاللنا okخلاص بهذي التحاليل تقدرو تبداو العملية بعد الدورة مباشرة
المرحلة الأولى وهي مرحلة تنشيط التبويض :
في 3 أيام الدورة من سهر أكتوبر رحت ثاني زيارة للمركز و اعطاني الطبيب إبر تحت الجلد اسمها ....قونال ......3في اليوم ولازم تأخذ على الساعة 6 مساءا
واعطاني موعد بعد أسبوع
رجعت في الموعد ونفس الشيئ عملولي تحليل دم وعملي الطبيب سونار مهبلي باش يشوف تطور البويضات و مدى استجابة جسمي للمنشطات وقالي راكي مليحة و زلدلي حقن قونال أخرى لمدة 4 أيام و معاها حقن أخرى اسمها سيتروتيد .
و رجعت في الموعد ونفس الشيئ يعني هوما يقومو بنفس العمل في كل مرة تحليل دم و سونلر مهبلي وقالي الطبيب جسمك راهو استجاب مليح للمنشطات واعطاني هذي المرة الابرة النهائية و هي عبارة عن ابرة تفجيرية اسمها اوفيترال وقالي ترجعي بعد 36 ساعة من موعد حقن الابرة باش ندير عملية سحب البويضات .
المرحلة الثانية و هي مرحلة سحب البويضات :
رحت في اليوم 13 من الدورة و طلعوني مباشرة للبلوك تاع العمليات على الساعة 7 صباحا و عطاوني طابلية بيضة لبستها وحدها وخذيت ابرة المخدر و التخدير راهو جزئي أو موضعي برك ودخلوني لغرفة العمليات وطبعا دخلت و أنا ميتة بالخوف وقلبي حسيتو قريب يخرج من مكانو هههه و العملية كانت سهلة نوعا ما على خاطر ماكنتش حاسة بالألم بسبب التخدير وبعد لي كمل الطبيب عملو قالي رانا سحبنا منك 10 بويضات ومن بعد عاودو رجعوني للسرير تاعي وبعد ما بدا تأثير التخدير يروح بديت نحس الألم يقوى وقعدت حوالي ساعة ثم من بعد لبست قشي و خرجت ...........وطبعا فوت ليلة عصيبة جراء الغازات لي جاتني من العملية لدرجة ماعدتش قادرة نوقف نمشي راكعة .
ايه قبل ماننسى طبعا هوما كانو عيطو لزوجي في نفس الوقت و خذاو منو عينة الحيوانات المنوية
المرحلة الثالثة وهي مرحلة ارجاع الأجنة :
هوما عادة في المركز يعملو الارجاع بعد يومين من السحب لكن أنا طاحتلي بالجمعة على جال هكذاك أجلولي العملية للسبت
رحت بالسبت ودخلت للبلوك و لبست الطابلية البيضة من جديد وكنا خمس نساء على ما أذكر دخل لينا البروفيسور شريف النذير وورالنا في شاشة الأجنة تاوعنا وقالي رايحين نرجعولك جنينين من الدرجة الأولى وتم الارجاع بكل سهولة و بدون تخدير لأنو سهل جدا و مش مؤلم .ولازم بعد الارجاع تقعدي 20 دقيقة ما تتحركيش نهائيا و من بعد رجعوني للسرير قعدت شوية وجات لينا الفرملية قالتلنا تقدرو تروحو ضركا خلاص وعطاتني وصفة لي كان كتبهالي الطبيب واعطاني تحاميل البروجيستيرون مهبلية لتثبيت الحمل واعطاني موعد بعد 16 يوم .
وطبعا رجعت للبيت و كنت نتحرك غير بالعقل و الأيام تمر ثقيييييييييييييلة والساعات تمر كأنها أيام و بعد مرور المدة المحددة عملت تحليل منزلي و كانت النتيجة سلبية ورجعت لعندهم في المركز عملولي تحليل دم و أكيد النتيجة كانت سلبية و الحمد لله على كل حال و الطبيب قالي كل شيئ كان سليم و ممتاز و الأجنة لي رعناهالك كانت ممتازة لكن ربي مازال ماكتبش و قالي تقدري تعاوديها بعد شهرين .
راني شرحتلكم بالتفصيل الممل نتمنى برك ما تكونوش مليتو و الله يدي تعبت ملكتبة مي في خاطركم كتبت تجربتي بالرغم من أني نتألم كي نتفكرها كنت دايرة أمل كبيسر فيها بعد الله طبعا لكن ...............قدر الله و ما شاء فعل .
وبلا ما ننسى الأسعار طبعا
الدواء كل وحدة و استجابة جسمها يعني السعر التاعو يتراوح بين ..............8 ملاين سنتيم إلى 10 ملاين سنتيم
مرحلة سحب البويضات السعر تاعها ثابت ...............10 ملاين سنتيم
التحاليل لي تتعمل عندهم و لي يطلبوها منك خارجا حوالي 3 ملاين سنتيم
يعني السعر الإجمالي حوالي 23 مليون سنتيم و في عيادات أخرى السعر يكون أكبر فمرحلة السحب وحدها توصل حتى ل15 مليون سنتيم .
نتمنى نكون وفقت في الشرح و ربي يوفقنا كامل و يرزقنا بالذرية الصالحة . |
سامحينا اختي لعزيزة على التعب وانو خليناك تتفكري تجربة مؤلمة ان شاء الله تحملي عادي وتجيبي توام يا رب يا اختي راني حبيتك في الله و معزتك في قلبي كبيرة