السلام عليكم وصحا فطوركم أخواتي الكرام
اليوم جبتلكم هاد الحلوى الرمضانية و ان شاء الله تعجبكم و اجربوها راهي هايلة و اقتصادية
المقادير:
في كاسرونة ندير نصف لتر ماء يغلي مع رشة صغيرة ملح و 6 ملاعق كبار زيت
في صحن غامق ندير 500 غ أي رطل فرينة و نفرغ عليها الماء الغالي و نحرك بملعقة خشبية حتى تتلايملنا العجينة و ايلا شفتيها ما تلايمتلكش و مازالت بعض الفرينة كيما كانت زيدي غلي غير شوية ماء و خلطيه مع الفرينة حتى تتلايملك و تولي مثل اللي فالصورة
نغطيها بكيس باش العجينة ما تنشفليش و نخليها تبرد مليح مليح
لما تبرد نزيد للعجينة حبة بيض كبيييرة و ندخلها فالعجينة بيدي حتى نتحصل على عجين مناسب
نسخن الزيت في مقلاة و نبدا نشكل فالزلابية تاعنا بواسطة جيب حلواني و قمع انا درت حبات طوال و درت تاني حبات صغار كيما اللي يبيعوهم بالكيلو
لما يحمارو مباشرة نغطسهم في عسل بارد و يكون عاقد انا استعملت عسل مرجان
ثم نديرهم في كسكاس يقطرو من العسل و نقدمهم
هدا هو القمع اللي شكلت بيه و من الأحسن ما يكونش قمع ذو أسنان خشنة غير المتوسك بزاف كيما اللي راني دايرة بيه
هاد الكمية راح تعطيلكم كمية مليحة
نتمنى تعجبكم الوصفة و اجربوها
سلااام
في أمان الله