راني في باريس عايش يا حضار تحت القيم الي امنيل بكحالو
انضل انهوم في الزنق ما عندي دار ونعدي في الكاتبة كيما قالو
لو نلقى من نندهو يدي لخبار يتلى بحكايتي نوصيهالو
يصفالي لاولاد نايل بيت ودار ويسال عليهم كل واحد بسوالو
ايسال على جيرانهم جار على جار كل لاخر حتى انيقنع بسوالو
يسال على الجلفة يمينة واليسار وثم عرش اولاد نايل مازالو
اهل امحاصن يكسبوهم للمشوار ركبيات مسلسين ويطوالو
طبعوهم بسروج والطرحة نوار طرز الفضة كل حال على حالو
الفرسان ايجو اثنين اثنين اعبار والبارود ايفز حوزات اكحالو
ايلا خليت احريمهم ترجعلي عار كاين لجدل والحبار على حالو
البنات الي يعشو على نجمة لفجار كثرة عند اولاد نايل مازالو
نراني يا خاوتي فيهم شكار ربي خالق كل واحد في حالو
قوللهم ياولاد نايل يا حضار ما قلتوش اوليدنا واش صرالو
وهم الغربة والوحش فيا مادار ودموعي من كل جيهة ينهالو
واهل الجلفة نشكروهم قاع اخيار كل واحد كلمتي نهديهالو
وليد احمد هو الي ناظم لشعار بن القبي جاب ذي النشد اوقالو