قلناها و نزيدو نعاودوها
للجماعة اللي تتأثر بالعاطفة و يطيحلهم المورال بسرعة و خاصة للناس اللي مازلها تتفرج على إعلام التفاهة تاع مصر و الشكامين تاعو + جرائد النفاق و الشرور و الليل تاعنا صايي كانو غير في الأخبار التافهة تاع المشاكل أصبحو في ثواني يفهمو البالون و يمنشرو في الشيخ سعدان و يقولولو دير هاكا و ماشي هاكا و عندو سعدان مليون حق لما رفض الحديث للصحافة التافهة.
سي نورمال الفرق الأفريقية المتأهلة للمونديال تصرالها مشاكل في الدور الأول تاع الكان و السبب الرئيسي هو استحالة التحضير الجيد للمنافسة بعد المجهود الكبير في التصفيات و تبعو الكاميرون و نيجيريا و كوت ديفوار و الجمعة نشوفو ثان غانا مع كوت ديفوار.
لذلك فالمنتخبات الكبيرة تدرس الوضع مليح في الدور الأول و تقرر تكمل و لا لا و كله ذاخل في التحضير الجيد للمونديال و هي فرصة كبيرة للتألق و إبهار العالم بأسره و ليس افريقيا فقط ، و إذا بغات تكمل تظهر بقوة في الدور الثاني و هو ما نتمناه للجزائر بعد أن نربح ماتش أنغولا الإثنين الجاي إن شاء الله.
أما المنتخبات اللي ما طلعتشي للمونديال و اللي فارغة شغل فهي تجد دورة أنغولا فرصة مليحة و تجبد قلبها باش دير الماكسيموم و هذا يكفيها.
يا ولاد الخضرة بركونا من هدرة القهاوي و ديرو الكونفيونس في الشيخ سعدان اللي مهما يكون راهو حققنا بفضل الله حلم غالي كثير و هو المشاركة في مونديال جنوب افريقيا 2010 و خصوصا نحن الفريق العربي و المسلم الوحيد في أقوى منافسة كروية في الكون.
تحيا الجزائر