[مولود حداد]

السلام عليكم ورحمة الله

بسم الله وعليه الاتكال = وبالصلاة على خاتم الارسال
محمد سيد الخلق والكمال = جابلنا الرسالة والدين

حكم المنية = جار فالبرية
وما هاذ الدنيا = إلا محطة عابرين

كل يوم راني نشوف = قدامي مالموتى ألوف
يروحو صفوف صفوف = فالمقبرة متجاورين

الوقت راه يجري = وانا ماندري
وش نقول فقبري = وغدوا يوم الدين

راح نقول كنت متنسك؟ = وفديني متمسك؟
لطريق ربي سالك = ولا طريق الغافلين

راح نقول كنت عالنية = نجيب القرآن والأدعية
والصفحة بيضاوية = ونقرا كتابي باليمين

ولا راح نتلعثم = كي نجاوب ونتكلم
ياربي ياللي جعلتني مسلم = فك من لساني عقدتين

هل راح نكون مشرق اللوحة = والإيمان راسخ ما تنحّى
صبحي فالعتمة مو فالضحى = كيما الناس راهم دايرين

هل ما راح نندم عالحج = اللي خليتو وكنت نتحجج
ربي عليّ ما فرج = والدراهم عندي مكنوزين

شكيت وكثرت مالشكوات = ضيعت حق الناس فالزكاة
ظنيت نخلد فالحياة = وكنت مالمغرورين

ما خلّيت كرشي تجوع احيان = وكنت ملهوف وجيعان
الصيام نحّيتو مالحسبان = وهو جُنة ودرع حصين

اموري ماكانت باينة = ما نتفكر نار ولا جنة
وشايف أنو الهنا = شهوات مع العاصين

وكانت النتيجة الحرمان = كل شي مغلوق في وجهي تيهان
عرفت أنو محال اللي غضب الرحمان = ينجح ويكون مالفائزين

لكن رغم هاذ الإخفاق = كاين خيط رفيع منو الانطلاق
خيط التوبة والإنسان سباق = للخير ويكون مالمستدركين

ننويها خالصة و صادقة = لله وحدو اللي يبقى
يجعلني مع آل التقى = في الجنة في عليين

بن آدم عمرو ما يقول خلات = مادامو عايش فالحياة
الحمد لله هاي كاينة مبشرات = اللي تجعلنا منطلقين

الهدف واضح ومكمم = ترجم هدي النبي صلى الله عليه وسلم
تدخل بيه وتقتحم = كل المناحي والميادين

وما خاب اللي ولّى لمولاه = وانكسرلو وترجّاه
ورضى بواش عطاه = وربي يحب التوابين

وتبقى خاتمة الختمات = الله الله يا خوتي فالصلاة
بيها يرزقنا النجاة = ربنا يوم الدين


اللهم ارزقنا قبل الموت توبة