[ريحانة]

اهلا وسهلا ومرحبا بيك اخي بشا الصيدلي
والله عجبنا ياسر ياسر السؤال انتاعك
وصح راهو عندك الحق ياسر
بالصح نقولك حاجة
انا قريت الجامعه انتاعي في التل كيما تقول وصدقني عمري ما بدلت حديثي الا اضطرارا بركة
كنت ديما نتحدث بالسوفي القبوري ماشي حتى انتاع تو، ويقولولي صاحباتي السوفيات واش بيك تهدري هاكا
اطيحي بينا والا كيفاش، انقولهم كيما هم ما يبدلوشي حديثهم حتى انا ما نبدلشي حديثي
ويقولولي نحنا نفهمو حديثهم وهم ما يفهموناشي، انقولهم كيما اجتهدنا نحن او ولينا نفهمو حديثهم ، لازم حتى هم يجتهدو ويفهمو حديثنا
رغم انو حديثنا سمح ياسر وساهل، خاطي ربي يهدي.
لو كان نتلاقا معاك وانحدثك فاس افاس، ممكن جدا حتى انت ماتفهمشي عليا بعض الكلمات، على خاطر انا ديما نحب نهدر بهدرة جدودنا القديمة
بالعاني وبالذمة باش نحافظو عليها وما تموتش.
فكرتك رائعة، نتمنى من الاخرين يعقبو عليها...