قولك خويا المشكل فينا حنا مشي فيلي سير فينا هوما دارو قرار لوكان جينا حنا عندنا كلمة وحدة والله واحد ميحط الملف نتاعو وانما نديرو احتجاجات مضاهرات ....... حتان يبدلو هوما القرار بصح اسمحلي خويا حنا شعبنا مانعرف خواف منعرف ساكت المهم ديما المطفرة فيه هو الشعب روح اضرب طلة في الأكاديمي تلقى الغاشي من 7 لل7 وهوما يدزو ... هذا يدل بلي الغاشي قع قابل وعاجبو الحال
مالا نقولك خويا (اشه فينا وبصحتهم) اسمحلي على العبارات بصح الله غالب القنطة تنطق
نعطيلك خويا مثال صغير ومنو هز انت المفيد انا نقرا في كلية العلوم فرع تحاليل بيوكيميائية جبت سنة هذي الليسانس نظام ل م د . عندما سجلت سنة اولى ل م د كان علبالي بلي نظام مستمر يعني نكمل ماستر دكتورا دون اي شروط , لكن من بعد مطاح الفاس في الراس ومركيت انا في نظام ل م د ظهر بلي كاين شروط سألنا حنا على هاذ الشروط قالونا انتوما الدفعة الأولى تفوتو كامل اللي نجح يكمل ماستر احنا مشينا بذيك الهدرة طاعت العام اللول والثاني والثالث لكن الثالث دخلت الإستدراك المهم اتصور نروح نسجل سنة اولى ماستر نلقاهم افيشاو قائمة بعشرين طالب يكملو ماستر والباقي قالونا يروحو الله غالب منقدروش نحكمو فوق العشرين والعلم احنا طلعنا في 21 طالب. احنا مسكتناش ةرحنا امام مكتب رئيس القسم و طالبنا بحقوقنا بالضرافة ومن بعد دورناها عنف اتصلنا بنائب العميد ثم اجتمعنا مع العميد الكلية ووصل الخبر الى رئيس الجامعة في غضون 24 ساعة جاء القرار بلي يفوتو كامل ماستر و بالفعل سجلنا وهزينا بطاقات الطالب الأسبوع الفارط
نضن بلي طولت عليك بالهدرة لكن حبيت نوصلك رسالة تقول( بلي العيب فينا احنا ولي سكت على حقو وحد ما يجيبهولو )
نتمنا تفهم اللغة نتاعي
ربي يوفقك