اللي تنسى لوصية
قصيدة للشاعر مولود حداد امل ان تعجبكم
ما كان حاجة قاسية *** على بن ادم في حياتو
قد هذيك الأذية *** اللي تتسبب فيها بنتو
كي تبيع نفسها بدنيا *** وتقتل عفتها وكرامتو
والناس بالنظرة الدونية *** يخزرو فيه ويشمتو
كان ثايق داير النية *** فيها وكانت مأملاتو
يعاملها ديما بالحرية *** ونفسو متشوقة تشوف بذرتو
ولات طبيبة او محامية *** بالعلم اللي في الجامعة اداتو
بصح الأقدار كانت مخيبة *** اشياء شينة والطفلة خذلاتو
امشات في طريق مخلية *** ثوب الإنحراف مفصل لبساتو
كبرت على الشرف دارتلو تعزية *** وصلات عليه زادت شيعاتو
فلاسيتي سيرتها صبحت حكاية *** كل يوم السهرات الشراب شرباتو
اتضل مع الذيابة صباح وعشية *** والي مايرضيها بالغير بدلاتو
وش ذنبو المسكين بابات البنية *** حطتلو نيفو فالتراب مرغاتو
وش ذنبو قولي اتجيه الخطية *** من اقرب الناس الضربة جاتو
اكتشف تبخر احلام وردية *** وعقم دعاء دعاه فصلاتو
اتكسر واصطدم صدمة قوية *** واتشرب لمرار الغصة حكماتو
ما درى موتو هكذا جاية *** بخنجر لغدر تقتل طعناتو
تحسر عاللي تنسى الوصية *** وعودها فمضمار الشر جراتو
ما قالت يما صاحبة الحنية *** رح تخيبها فاللي تمناتو
وتضيع تعبها وسهرها علي *** الدموع من عينها دم سيلاتو
ما قدرت كلمة خويا *** اترجى خير في سمعة خوتاتو
يا بنات اليوم لا تحسبو القضية *** ساهلة الناس عالشرف ماتو
وهذي كبيرة وكبير المعصية *** يجي مالصغير اذا راكمتو
يا سعدها المستورة الحجوبية *** عرفت قيمة زينها خباتو
ما غرها مال لا غرتها دنيا *** نهج الصالحات فيها تمثلاتو
خديجة عائشة وسمية *** ماشية على خير الشر هجراتو
ويبقى نقولك ككلمة ختامية *** احرصي على دينك قلبك وثباتو