[مولود حداد]

السلام عليكم ورحمة الله

جئتكم اليوم بقصيدة تحكي جانب من حياتنا اليومية وهو رد فعل شبابنا لما تزعف منو البنات
هذه القصيدة ستكون إن شاء الله صوتية ومكتوبة حتى يكتمل النصاب مع نقصان ثلاث أبيات في الصوتية


أفـْتِيلِي يَا خْتِي نَرْكَعْلَكْ **** وْلَحْرَامْ مَاعْلِيشْ حَلْلِيهْ
شُوفِي فِي مَذْهَبْ الإِمَامْ مَالَكْ **** وَلاَّ الشَّافِعِي كَامَلْ أقْرِيهْ
وَلاَ اجَبْدِي مَذْهَبْ خَامَسْ عَلَّكْ **** تـَلْقَايْلِي عُذْرْ نَعْتَذَرْ بِيهْ

سَامْحِينِي غْلَطْتْ فِي حَقَّكْ **** وَالجُرْمْ مَنِّي أَنْسِيهْ
يَاخْتِي أنَا هْتَفْتْ وْبِيبِيتْلَكْ **** وَsms مَا نَعْرَفْ إذَا حَسَبْتِيه
انَا فَالصْلاَة مَا نْسِيتـَكْ **** لْسَانِي بَالدُّعَاءْ جَرِّيتِيه
وْجَابْلِي رَبِّي ذْكَرْتْ أسْمَكْ **** كِي زَدْتْ نَادِيتْ بِيهْ
وَشْ رَحْ نْزِيدْ نْقُولَّكْ **** غِيرْ قَلْبِي مَا يَهْنَاشْ كِي تَزَعْفِي عْلِيه

قـَالَتْ مُحَالْ نَسْمَحْلَكْ **** قـَلْبِي ادِّيتُوا وْلْعَبْتْ بِيه
جْعَلْتْنِي بِيكْ نَتْمَسَّكْ **** وْخَلِّيتْنِي الهَمْ نْقَاسِيه
كِيمَا عَذَبْتْنِي نْعَذْبَكْ **** عُمْرَكْ تَسْهَرْ لْيَالِيهْْ
الله نْشَالله لاَ تْرَبْحَكْ **** تَتْحَطَّمْ وَتْشُوفْ التِّيهْ
هْنَا قـُلْتْ أنَا مَا ظَنِّيتَكْ **** قـَلْبَكْ بَالاَسْوَدْ لَوَنْتِيه

تْشَكْ يَا وَعْدِي تْشَكْ **** وْرَاسِي مَا نْزِيدْ نَحْنِيهْ
غِيرْ لْرَبِي المَالَكْ **** غَافَرْ لَذْنُوبْ كِي نَدْعِيه
جْرِيتْ مُورْ لَبْشَرْ الهَالَكْ **** وْخَلِّيتْ اللِّي نَفْسِي بِين يَدِّيهْ
يْقـُولِّي مَهْمَا غْلَطْتْ نَغْفَرْلَكْ **** يَا عَبْدِي وَانَا صَادَدْ عْلِيهْ
يَا أخِي رُدْ بَالَكْ **** وْكِي تْقُولْ كْلاَمْ وَشْ تَعْنِيهْ
حُبْ الله إذَا مَا رَدَّّكْ **** تْخَافْ زْعَافُو وْتْرَاضِيهْ
رَاكْ تَكْذَبْ عْلَى رُوحَكْ **** وْأَصْلاً اللِّي تْحَبُّو تْطِيعُو مَا تَعْصِيهْ

القصيدة صوتية من هناا

https://up.m5zn.com/136L8LL3L0K4/eftili.wav