[السمسمه]

الشعب الجزائري كل يوم يبكي و يشكي الغلاء و الاسعار و الاسطوانة القديمة نتاع معندناش و مقدرناش لاكن جاء رمضان صح و بعدو بايام الدخول المدرسي راني معاك ثم العيد و قلنا معليش لاكن في هذا الثلاث مناسبات شفنا انو في رمضان القفة الله يبارك كل و احد يقري لاخر كيفاه تكون معمرة و كامل يحكيو واش واساو لفطور و كثر الاطباق و خلي الجيب يغني و جاء الدخول المدرسي و دخلو لاولاد بملابس و ادوات و كراطب و الله عمري محلمت نكسب كيفها و خلي القصات لبنات و الاكسسورات و زيدددددددددد و جاء العيد و شفنا الحلويات اشكال و انواع و اللبسة الغالية لناس كامل كبير و صغير كامل بالجديد و الدراهم فايضين على لاولاد يطرطقو فالمحريقات من الي تسوى 2دج و هذو يطرطقوهم بالعلب الكبيرة و حتان الغاليه كامل الي تواسي 1000دج و يقولك معنديششششششش



مفهمنهاش الا هك معندهمش الي عندو كيفاه عامل
انا بكري نعقل على روحي كي يكون الدخول قريب للعيد نشري مرة و نلبس ملابسي نهار الدخول و نخبيهم للعيد و دراهمي نطمهم و نشريهم ادوات
اليوم التبذير راو لاعب لعبو تقول الجزايرين راقدين على الدراهم و يترقدو يعني و يشكيو و الله تقول يبعدو فالعين تسمع الشيكايات تقول صح تشوف لحالهم تحير و يغلب راسك من التفكير


بصح راني متاكده من حاجة انو الزوالي و الي معندوش يستر روحو و عمرو ميشكي لانو وببساطة الشكوى لغير الله مذلة
و يقولك خليها فالقلب تجرح و متخرج لبرى و تفضح

الي فهم فيكم يفهمني

مجرد راي
سمية