الأخت عندها الحق ، أنا ثاني المجمد عندي ديما فيه : جبن ، باتي ، زيتون بالأنواع ، صلصة طماطم محضرة ...............
هاذو كي نحب ندير بيتزا سوفلي قراتان نلقى عندي الحوايج مباشرة نبدا في الطبق ، هاذي الأولى
الثانية : ديما لما نطيب أطباق كيما : طاجين زيتون أو طاجين الحلو أو ...... هاذو الأطباق اللي يحمرو الوجه ، نحتفظ بمقدار صحن أو 2 في المجمد مع قطعو أو 2 لحم باش إذا جاك ضيف على غفلة تلقاي عندك الماكلة واجدة ماعليك غير تسخني
أيضا لما ندير مطلوع أو خبز الدار نخبي قرصة في المجمد وهو جديد كي يتسخن في الميكرو مايبانش
ديما نحتفظ في المجمد بحلويات أيضا و معجون نحطو في صينية القهوة لضياف الغفلة .
شوفي : كاينة مقبلات ممكن توجديها وتخبيها كيما قالت الأخت وما عليك غير تقلي ، أو ممكن ساعات نحتفظ في المجمد بالحشو نتاع سوفلي أو كوكا أو بوراك كي يجيوك الضياف يبقالك غير تحضير العجين .
أيضا شوفي هاذي المقبلة بالكواسون راهي جدا لذيذة و تحمر الوجه ، نخبيه في المجمد زكي نحب نستعملو نجبدو ندير شوية فرماج ولحم مفروم وانتهى أحلى مقبلة و خفيفة تهبل ، هاهو الرابط :
https://www.djelfa.info/vb/showthread.php?t=1208088
أما إذا حابة قائمة متناسقة ، عندك لازم :
* مقبلة ( تكون بوراك ، سوفلي ، كوكا ..... ) شوفي قسم المقبلات واختاري واش يعجبك
* خبز النوعية حسب الأطباق المقدمة
* سلطة ، نفس الشيء
* حساء ، شوربة فريك ، أو حساء جبن ......
* طبق رئيسي ( قراتان ........) يوجد الكثير من الأطباق ويستحسن تكون حاجة خفيفة إذا كانت القائمة فيها كل هاذو اللي ذكرت باش ما تخسريش الماكلة وتبقى
* عصير
* فواكه
* تحلية خفيفة ، تيراميسو أو فلان ........كاين بزاف تحليات هايلة في قسم التحليات
* ممكن قاطو حاجة خفيفة ( بسبوسة ، كروكي مع الشاي
ماشي شرط ديري هاذو كامل المهم أنا عطيتك الفكرة . المهم تذكري ما تكثريش الأطباق باش تتحكمي في الموضوع