السلام عليكم
من المفروض نجيبلكم صور تاع داري باش تعاونوني لكن الله غالب ما عرفتش نبعثهم من الايباد اسمحولي
المهم انا بديت. نشري في الحوايج وراني نبات على راي ونصبح على راي فقلت ما عنديش منغير خياتي في المنتدى يوروني شطارتهم ونخرج معكم في راي الحاصول اليوم نحكي على الصالون والمرة الجاية غرفة نومي
الصالون تاعي صغير شوي و هو صالون وفي نفس الوقت بيت الجلوس لانو في الطابق السفلي عندي مطبخ وحمام والصالون
الصبغة ثلاث حيوط بني فاتح وحيط بالاسود هذا خصصت باش نعلق التلفاز يقابلو مباشرة النافذة
والباب ما كانش خليت شغل كنتوار على اليمين واليسار ودرتلهم قطع الرخام
لون الكرلاج كريم مع شوي ازرق فاتح وزخرفة فضية تلمع فقط كيظرب فيها الضوء
في الاثاث راني حايرة في الاول قلت نهي راسي وندير فوتايات بصح لقيتها ماشي عملية عندي الولاد الصغار والواحد يحب ياخذ راحتو في الجلوس واذا درت صالة ماروكان ما يبقاليش الوسع للطابلة والكراسى تاع الصالة مونجي
وزيدي كاين باب في حيط التلفاز يخرج الى الفرندة انا قلت ندرلو ريدو نغلقو وندير الصالة مونجي في ذيك الركنة
عندي زربية جديدة رمادي غامق وشوي ازرق فاتح بصح الرمادي هو الغالب زربية كانيش وكبيرة
الريدو قلت السقف هابط شوي ايمالا مانديريش الكاش ريدو
واللون رمادي غامق. والدخلاني بيج او بني ممكن يكون فيه ازرق
والثرية شراها المييسيوو تشبه للفوانيس المصرية تاع رمضان قبل لانصبغو الصالة لونها شغل نحاسي وفيها حجر حمراء وخظراء
انا قلت ندير فوتايات لون اسود او رمادي او بني غامق وندخل الوسايد بالوان زاهية والطابلة كاري وبنية
والصالة ماروكان ما عنديش اي فكرة