سلام حبوباتي اليوم حابة نعتلكم طريقة عمل الكبدة في الفور هايلة وبنينة وتستاهل نبداو نشالله: نقطع الكبدة تاع الجاج قطع صغيرة ونضيفلها راس ثوم مهرس ونص ربطة معدنوس مقطعة ومغرف كبيرة هريسة ومغرف كبيرة طماطم مصبرة ونملحو وفلفل أسود و2 بيضات و2 مغارف خبز مرحي ونخلط مليح ثم ندهن القوالب تاعنا بالزبدة ونذرذر عليهم الخبز اليابس ونحط قليل من خليط الكبدة ثم طبقة فرماج ثم الخليط وكي نكمل جميع القوالب نذرذر عليها من الفوق الخبز اليابس مرحي ونحطها في مول فيه ماء سخون أي حمام مائي ونحطها في الفرن مدة ساعة نبداو نحسبو ساعة كي يبدا الماء في الغليان كي طيب نخليها تبرد غير شوي ونقلبها ونقدمها مع البطاطا المقلية أو كيما أنا أصابع البطاطا تاع الأخت أم أماني يعطيها الصحة وكل وحدة التفنن تاعها وهنا حطيت معاها تغميسة تهبل ضفتلها شوي هريسة ونخليكم مع الصور توضح أكثر انشاء الله نشالله نكون وفيت وكفيت ويعطيكم الصحة نشالله يالغاليات وأنا دائما في الخدمة