[faizarbh]

وصفات يوم الاربعاء :2013/01/30


** غراتان بالدجاج **
وصفة فرنسية
2 صدر دجاج مقطعين مربعات ، باقة معدنوس صغيرة ، فلفل و ملح نرحيهم فالروبو مليح و نزيدلهم ملعقة أكل مايزينة و مغرف زيت و نعجنهم مليح .
كيلو بطاطا مقشرة ومقطعة دوائر و مفورة مع ملح و فلفل .
في مقلة ندير 2 حبات بصل مقطعة شرائح و ندير 3 مغارف كبار زيت و الفلفل و الملح على نار هادئة مدة 10 د بعدها نرمي فيها عجينة الدجاج و نخليها تتقلى حتى يولي لون الدجاج أبيض .
نحضر صوص بيشاميل حوالي كأس فقط ثم نحيها من النار و خليها تبرد شوية و ضيفلها 3 صفار بيض + 150غ جبن أحمر مبشور.
في مول الفرن الخاص بالغراتان ندير نصف كمية البطاطا المفورة يعني حوالي رطل ثم ندير عليها خليط الدجاج كطبقة ثانية ثم نضيف طبقة البطاطا اللي بقاتلنا ثم ندير فوقها البيشاميل يعني من فوق على الوجه و البيشاميل اجي عاقدة مشيها بمغرف و نرش عليها من فوق شوية جوزة الطيب و ندخلها للفرن مدة 20د حتى تحمار.


** سوفلي **

رطل فرينة
مغرف قهوة ملح
فنجال شاي زيت
2 ملاعق أكل خمارة خبز
2 ملاعق أكل لحظة
حبة بيض كاملة
نخلط كل المقادير بالمائ دافئ و نخلوها ترتاح
الحشو: نطيب قطع مرقاز و نقطعهم و نديرهم مع صوص طماطم حتى يمتازجو و نشكل العجينة تاع السوفلي و ندير شوية مرقاز مع صوص طماطم ثم جبن و نغلق عليها و من فوق ندير ثقب صغير و ندخل فيه حبة زيتون أسود و نطليها بصفار بيضة ثم نرش عليه شوية سميد حرش و ندلها للفرن اطيب.
هذا تطبيق الاخت الكروان الجريح



** الكاشير **
3 مغارف أكل أرز مغلي
رطل les abats de poulet مقطعين مربعات صغار و نغلوهم ثم نرحوهم و نزيدلهم 3 مغارف أكل زيت و شوية زيترة و ملح و فلفل و راس الحانوت و ملون أحمر و الملون نحلوه في شوية زيت باش نضيفو ثم نرحي الارز و نزيد نخلطو معاهم و زيد للخليط 4 ملاعق خبز يابس مرحي كيما قلت نرحو الكل مع بعض ثم نضيف فنجال زيتون أخضر مقطع دوائر و ندير الخليط في ساشي تاع سباقيتي و نعقدوه ملييييييح و نطليها بالزيت من برا ثم نديروه في حمام مائي فيه ملح و خل و ندخلوه للفرن مدة ساعة و 10دو كل 10د نقلبوه علي جيهة ثم ننزعوه و نلوه يبات ليلة كاملة ثم نقطعوه و نقدموه .


** حساء العدس بكرات السمك **

حبة بصح مقطعة مربعات
5 سنينات ثوم مقطعين رقيق
ملح . كمون . كروية . فلفل عكري .
باقة كرافس
6ملاعق اكل زيت
ملعقة اكل طماطم مصبرة
2 قطع جامبو ذوق سمك
3 حبات جزر مقطعين مربعات
حبة قرعة مقطعة مربعات
حبة بطاطا مربعات
نضع الكل في قدر ثقيل او كوكوط و يكون عالي و نقليهم مدة 20د و نقدرو نضيفو معاهم حبة طماطم او نصف هدا اختياري و تكون مرابية .
في هاد الاثناء نغسل العدس بالماء الساخن مقدار رطل و من الاحسن يكون ذو لون أخضر ثم نصفيه و نحطوه يتغلى فالماء + نص حبة ليمون مدة 20د يعني يطيب نص طياب .ثم نصفيه و نديروه فالقدر مع المكونات الاخرى 10 د اخرى يتقلى معاهم و نضيفلو الماء و نخليه يطيب.
في هذه الاثناء ندير نحكم رطل سردين ننزعلو العظم و نقطعوه مربعات صغيرة و نديروه في ليان تاع طين + حبة بصل مرابية+ ملح+ كمون + كروية + فلفل عكري + مغرف سميد حرش + مغرف فرينة و نبدا ندعك فيه ثم نشكلوه كرات اي بولات متوسطين و كي يبدى العدس يغلي و يكون دخلو الطياب نرمي فيه البولات تاع السردين و نفوج الغطاء شوية على القدر باش يدخل الهواء مدة نص ساعة و نطفي .


** حلوة المشقق **
3 كيلات كوكاو مرحي رقيق
2 كيلات سكر قلاص
3 حبات بياض بيض
مغرف صغيرة فاني
نص مغرف قهوة خمارة حلوة
ملون كيما تحبي
عطر فاني
للتزيين شوية سكر قلاص و كمشة كوكاو مدشش
في إاء نخلط الكوكاو و الفاني و السكر و نزيد الخمارةثم البيض واحدة بواحدة و البيض الابيض مايكونش مضرب حتى نتصل على عجينة طرية و نشكل كرات مثلا المشوك و نرمدهم في السكر قلاص و فالوسط ندير ربع حبة كوكاو و نطيبهم 10د فقط و كي اطيب تتشقق و يطيبو بيوضة مش حمورا.


** حلوة السميد **
2 كيسان سميد متوسط و نرشوه بشوية ماء زهر قيس نص كاس و نفتلوه كيما نفتل الكسكس و نلوه يبات ليلة كاملة ثم نديروه في كاسرونة ع 6 ملاعق اكل زيت او 2 مغارف زبدة اكل غامولي و نخلط فالكاسرونة بارد في بارد ثم نفتح ملون غذائي في لعقة اكل تاع زيت و نضيفوه للسميد ثم كاس سكر عادي و نخلط ثم نرش شوية ماء زهر ثم نشكلها و نضغط عليها مليح و نشكلها بواسطة لي مول تاع الطابع و نديرهم فالفرن مدة 10د على نار قليييييييلة.


** لي بينيي**
500غ فرينة
3 مغارف اكل سكر عادي
2 مغارف اكل مايزينة
حبة بيض
2 مغارف اكل زبدة بوماد
بالتقريب كاس و نص حليب دافئ و نحي منو فنجال
ملعقة اكل خمارة خبز نذوبها في فنجال الحليب اللي خليناه
1 باكي خمارة حلوة
نخلط المقادير و نلم العجينة بالحليب
بالنسبة للبيض نضربها باش نديرها
هاداك الفنجال تاع الحليب اللي نحيناه و ندير فيه مغرف اكل خمارة خبز و نل العجينة و نخليها ترتاح 30د ثم نكسرها و نلحا كامل و نليها ترتاح 15د أمام مدفئة و بقالب دائري او بكاس اينوكس نقطع دوائر ثم نسن الزيت و نقليهاو كي اطيب نحشيها بالمعجون او خليها هكداك و نرش عليها سكر قلاص.


**مسكوتشو**
5 حبات بيض
كاس سكر
نص كاس سكر قلاص
مغرف قهوة سائلة
قشور برتقال
نص كاس زبدة ذايبة
5 مغارف أكل عصير برتقال
ثم 3 مغارف اكل كاوكاو مطحون و 2 كيسان فرينة و نص كاس مايزينة و 3 خمارة كيميائية هادو نخلطهم وحدهم في ليان .
نضرب بياض البيض على شكل ثلج و نضرب الصفار وحدو ثم نضيفوه للبياض و نضيفلهم كاس سكر و نخلط ثم السكر رطب و نخلط ثم نص كاس زبدة و نخلط ثم عصير البرتقال ثم خليط الفرينة و الكوكاو.
في مول دائري ندهنوه بالزبدة ثم نرشوه جييييدا بالسكر قلاص ثم نزيدلو السكر قلاص و نهزوه باش يلصق في كل المول و ندير الخليط فالمول و ندخلوه للفرن من 40 حتى 45 د .

و هدي صورتو



يتبع