راني نعمل في إدارة مركزية و ما نخبيش عليك، صح كاين ناس ماصابوهاش لكن راني نفكر باه نحبس للأسباب التالية:
- أمامي مستقبل مجهول (الإدماج مرتبط بتعديل قوانين التوظيف الحالية، و أي إدماج خارج الإطار القانوني مستحيـــــــل) معناه نستنى الحكومة وقتاه تنفحلها تدمجني، إلى متى..... مانعرف؛
- نمط التوظيف الحالي لا يخدمنا بتاتا (على أساس الشهادة)، المسابقات ولاو ينجحو فيها أصحاب الخبرة الطويلة (أكثر من 5 سنوات) خاصة مع الموضة الجديدة وين ولاو الموظفين المرسمين يشاركو في مسابقات التوظيف الخارجية للإرتقاء إلى رتب أعلى عوض المسابقات الداخلية، لأنهم ضامنين البوست (عندهم خبرة طويلة) كيفاه يصيحلي بوست وسطهم و أنا اللي عندي خبرة تاع عام و نصف؟؟؟؟
- منحة 15000 دج شهريا غير كافية باه الواحد يبني بيها حياتو على المدى الطويل (الزواج ما رانيش مطلعلو حساب خلاص)؛
- ماهومش يدفعوا علينا الإشتراكات في صندوق التقاعد، معناه السنوات هاذي ريــــــــح ما تصيبهاش نهار تدي la retraite (ما لازمش واحد ايشوف قدام نيفو برك، خمم للزمان عقوبة)؛
- الحريـــــــث، تخدم أكثر من الموظف المرسم و أحسن منو لكنو يخلص ضعف المنحة تاعك ويزيد يدي les primes ونتا التشوف غير بعينيك؛
بالرغم من هذا و بالرغم من حالة الاحباط الشديد و اليأس اللي راني نعيشها نقول الحمد لله، ما بقالي غير القطاع الخاص أو مسابقات التوظيف على أساس الإختبار (ما نزيدش نجتاز المسابقات على اساس الشهادة).
نطلب ربي يرزقني و يرزق كل من هو في حالتي بمنصب عمل محترم و مستقر.