اهلا بنات
نهنيكم على الموضوع الراااااااااااااااااااائع
انا باختصار ماعنديش برنامج معين يعني مازلت نتعلم تحمل المسؤولية والتنظيم و تقريبا هدا حال الاغلبية
بديت نتعلم ندرس الميزانية وتقسيمها و بالتالي نحاول نرتب برنامج الاكل
في العموم الماكلة لازم تبقى الا ادا كانت عايلة كبيرة الله يبارك و كاين اطفال الله يحفظهم
شفت بزاف مواضيع و جمعت انواع الطياب شوفوها ويمكن تقسيمهم عالاسبوع بدون تكرار الاكلة مع للعلم انها تبقى للعشاء
او لغداء اليوم التالي يعني الجدول ما هوش ثابت
مثلا
يوم حبوب .....لوبيا او عدس او دوبارة او pois cassées
...يوم عجائن... مقرونة او سباقيتي او تليتلي او اي نوع
.يوم شوربة .....تحبي فريك او فيرميسال او تشيشة او لسان العصفور مع اي نوع من السلطات او الفريت
.يوم خضر يعني مرقة مثلا جلبانة او محاشي او مرقة البطاطا في الكوشة او غراتان او شوفلور المهم على حساب الموجود
......يوم ارز بلاصوص بالزيتون و الجزر مقطع دوائر
نهار بيتزا او محجوبة على حساب الاستطاعة
الكسكسي كل واحد بواش يحبو
وفي يوم نجيبو سردينة ونديروها غدا مع لا صوص tomate
يابنات تقسيم كل يوم نوع من انواع الاكل هناك اخت هنا في المنتدى في موضوع تقسيم الشهرية هي اللي قالت عليه
ربي يجازيها كل خير وانا عجبني
وهده مجموع الاكلات اللي جمعتهم من صفحات هدا الموضوع و شوية من عندي جمعتهم في هده المشاركة و خيرو وش حبيتو
كسكسي سيد الاطباق الجزائرية بالمرقة او مسفوف او بالحليب او بالزيت زيتون عند القبايل او سفة حارة لصحاب الشرق
شخشوخة و ثريدة و مشتقاتها تاع الشاطرات
خضرة محشية او دولمة عند اهل الوسط الجزائري
مرقة زيتون و لحم مرحي وهده ايضا اسمها الدولمة في الشرق
purée باي نوع من اللحوم مرقاز او دجاج محمر او لحم بقري شرائح او لحم مرحي بصوص
مرقة جلبانة
شوربة بيضاء او حمراء او اي نوع من الحساء
مقرونة او سباقيتي او تليتلي او لازانيا والالزانيا تقدري تخدميها في الدار و تجي هااااااااااااااااااااااايلة
فريت
عدس ولوبيا
ملوخية
بيتزا او كيش او اي نوع
سمك و صوص طومات
محجوبة
ارز
كويرات بطاطا يعمي معقودة او سفيرية اوكريات ارز
شوربة بالحليب خفيفة في الليل كاين اللي يحبها بالسكر او بالفرماج
كسكسي بالحليب او باللبن ايضا خفيف في العشاء
اوراق كرم محشية
كمونية تعمليها بالكبد و القوانص اللي تجمعيهم من الدجاج اللي تشريه كل شهر
ماسيدوان و اي سلاطة اخرى مشكلة
انواع الغراتان
هدا وش راني متفكرة ظرك
وننصحكم تشوفو وحد الموضوع تاع تقسيم الشهرية مليح بزااااااااااااااااااااااااااااف انا مقدرتش نحط الرابط تاعو لانو مشاركاتي قليلة
يعني ماسمحوليش نحط اللي تلقاه تحطو للبنات
في تقدرو تنظمو الميزانية و تشرو انواع اللحم بما فيهم الدوارة اللي نتفكروها في العيد الكبير برك بالرغم انها ارخص من اللحم البقري
يعني نقرو نحضرو العصبانة العزيزة هههههههههههههههههه
اتمنى نكون افدتكم و انا عجبني بزااااااااااااااااااف الموضوع
اهم حاجة ربي ندعو يباركلنا في رزقنا و راح تكفينا الشهرية و ناكلو مليح مع الحفاظ على باقي المصاريف مع الصدقة ضروري
في امان الله