[نافلة]

السلام عليكم و رحمة الله تعالى و بركاته
كيراكم يا الفحلات
اليوم نضت مفزوعة قول عليك رايحة نعgب كاش امتحان
نجري للكوزينة عندي ليزيليمو مقسمين على ثلات جيهات كنت من يومين منظفة جهتين و اليوم كملت الجهة الثالثة و زدت فوت عليها من الخارج و دورت للكويزنيار زدت فوت عليها على الخفيف لقيتها نظيفة لاني من عادتي كلما كملت منها نظفها في نفس الوقت و زدت رحت فوت على الطابلة و الكراسي نتاوعها ومن بعد عجنت عجينة البيتزا و خليتها على جنب في هذه الاثناء ناضت بنتي لابين ما توضت و صلت انا وجدت القهوة تقهويت انا وياها وهي راحت تحل تمارين الرياضيات و انا روحت فرشيت اسناني و دهنت وجهي بزيت زيتون و مشطت شعري و بديت في الثلاجة لقيتها نظيفة ماتعبتنيش في هذ الاثناء ناض و ليدي قمت به كانت اختو كملت التمارين جبدتلهم الالعاب و درت ليهم التلفاز و لميت البيوت و نظفت الدوش و المرحاض حاشاكم و فوتت النشافة اعزكم الله
غسلت و جهي بصابونة الطرف و درت شوية كحل و شوية غوج
و رحت للكوزينة درت البيتزا طيب كانت عندي لاصوص تومات في الكونجيلاتو مع شوية الجاري نتاع البارح و التشينة و حطيت فطرنا و غسلت الماعين و دهنت ايديا و رجليا و قعدت ندردش مع حباباتي ...
***
الجانب الديني بالنسبة للصلاة راني معذورة ولازمت الاستغفار و الصلاة على النبي صلى الله عليه و سلم .
هذه هي حكايتي اليوم و السلام عليكم و رحمة الله تعالى و بركاته
تصبحو على الف خير