للأمانة منقولة لوصفة لكن جميلة وواظحة نتمنى نكون ساعدتك اختي مقادير 1كلغ فرينه 250 غ زبدة صول قرصه ملح 1 بيض 2 فاني 2خمارة حلوى للعجن بماء الزهر والماء عسل عاقد للتعسيل وزيت للقلي وجنجلان للتزيين التحضير انا درت نصف الكمية لأنو قريوش يقطع بزاف نذوب الزبدة انا ديت 125 غ نحط الفرينه+ 1 خمارة + 1 فاني + قرصة ملح نخلهم نضيف الزبدة تكون سخونه باش تدخل مليح في فرينه ونحكها غايه باش الحبيبات ميقعدوش فيها ثم البيض , ونعجنها بالماء يكون دافي وماء الزهر مطريش العجينه بزاف باش متغبنكش في انشاء شكلها نديرها في كيس بلاستيكي ترتاح لمدة 30 او 35 د نشكل حربوش و نكسلو بالة العجين هنا الالات تختالف كاين من صغيرة للكبيرة وكاين من الكبيرة لصغيرة انا رقم 1 هو ارقق و رقم 9 اخشن حليتها في رقم 6 ثم اطويها على نفسها وعاودي حليها ثم حليها في رقم 5 ثم اطويها وعادي حليها في نفس الرقم وهذا سر انتفاخها و خفوفيه نتاعها نشكل مستطيل وندير في كل واحد 5 اسطر هنا الشكل كل وحدة وكيفاش تشكل انا نعرف غير هذا برك هههه ودرتلكم بسياله لأنو منعرفش نخدم بيدي ونصور زاوية نتاعها نجبها ونخرجها للفوق تصبح بهذا الشكل وكل ما تخدمي تغطيه بكيس بلاستيكي باش ما ينشفش ويتشقق من فوق وميتنفخلكش في قليان كي نكملو كل العجين نحط الزيت في مقلاة او طاجين القلي ونخليه يسخن كي يسخن نولي نقلي واحمرار يقعدلك ياتحبي لون ذهبي يا تحبيه لون برتقالي ويتعسل ديركت كي يتقطر في عسل يكون ثقيل باش قريوش تحافض على نفسها لمدة طويله ومتتعجنش كي تعسليها خليها تقطر من العسل وزينيها بجنجلان شوفو كيفاش جي في الوسط مورقه وجي فارغه اي مش معجنه ملاحظة = الزيت مالازمش يكون سخون بزاف واذا كانت اول مرة تخدميها انت سخني الزيت وارمي وحدة فقط اذا حمارت بلخف اعرفي انو الزيت سخون بزاف لازم يبرد شوي وتنقصي النار واذا قعدت التحت متطلعتش اعرفي انو مزال ما سخن زيادة وديما تكون النار هادئة