السلام عليكم جميعا
أنا في رأيي يجب التريث قبل الموافقة على زواج البنت في وقت مبكر. للأسف بعض الأباء و الأمهات يخافو على عنوسة بناتهم ولهذا يسارعون بتزويجها للأوائل من يطرقون الأبواب وهذا متعارف عليه في البلديات و القرى بكثرة لكن جل ما رأيته كان عواقب وخيمة و الطلاق آخر ما يذكر.
لو استفسرت عن الأسباب التي فتحت أبواب المشاكل و الشقاق بين الزوجين فستتفاجأ لتفاهة الأسباب كما سبقني الأخ الفاضل قالك بسباب " قارورة عطر" فهل هذا معقول. الجانب العملي هل هاد البنت لي رانا نتكلمو عليها كفاءة في المطبخ و طبعا هذا من المستحيل 16 سنة لا أظن أنها تعلمت كل شيئ و نحطو أنفسنا أمام أمر الواقع اولادنا و بناتنا غير البرنامج الدراسي لي راهم غابنينهم بيه بزاف عليهم وقتاه تتعلم البنت الأمور تاع البيت و الطبخ وقتاه يكون فيه وقت للتسلية للترويح عن النفس و الخروج من الجو الدراسي مثلا. فمن هنا النتيجة واضحة فمن الأفضل تأخير الزواج على الأقل 21سنة فما فوق.
أما عن قضية الفارق الكبير بين الزوج و الزوجة في السن بالتأكيد لا يوجد هناك مشكل فمادام لم ياتي نص شرعي يكره زواج الأكبر سنا بالأصغر سنا وين راه المشكل لاكان خدام و انسان مربي ولد فاميليا وين راه المشكل ياك كيما يقولو الراجل عيبه جيبه و بلا مانحكو على التربية و الدين كي يكون واحد من هادو ناقص لهنا يكون فيها حسابات أخرى.
و مشكل العنوسة في هاد البلاد يعود طبعا لغلاء المعيشة حمبوك خمسة عشرين مليون غير ذهب علاش حاسبين الشباب هدا عنده مال قارون ولا نهري .....ولاكان ربي وفقه و تزوج الله يرحم الوالدين يعيش المخلوقة و يقلشها ولا الأطفال يقريهم ويلبسهم مليح.لهنا غير لاكان موظف في سلك من أسلاك الدولة ايا و المساكين لي كانو لاصقين في طوابل و نحاوهملهم و الناس العاطلة لي كانت تبيع في البطاطا و النعناع في الأسواق التي قالو عنها تشين المظهر تاع المدن واش
من نظافة المدن الله يهديهم حتى ينقو نفوسهم من أموال الناس المسروقة
مازال و مازال تشوفو ارتفاع في نسبة العنوسة وهذا يرجع للمشاكل التي يعانيها الشباب. ربي يسترنا و يستر العاقبة تاعنا هاد البلاد راهي على الحافة الله يسترنا و يستر العاقبة و ينعم علينا بحسن الخاتمة.
أنا ضد الزواج المبكر لسببين مهمين:
لاكان نبقاو نزوجو في بنات 16 رايح يوقع خلل بنات 25 و 30 سنة كيفاش يديرو؟
ومازال الحال على بنات في سن السادسة عشرة
و البنات لي راهم يشوفو فينا ضد زواجهم نحن نناقش فقط شوية من عندنا و شوية من عندكم وادا شفتونا على خطأ هاتو ما عندكم.
تقبلو رأيي هذا طبعا يبقى مجرد رأي
سلام