[ام ملاك.]

انا ماشي ام رامي مي حبيت نفيدك اذا تتقبلي مروري
اول شي اذا عرضتيهم للغذاء وجاوك بكري شوية ماتحذيش قهوة اعطيهم العصير برك
والغذاء باش ماتحصليش ديري لاسوب نتاع خضرة ديري حبة طماطم زرودية وكورجيت وبطاطا وبصلة وثوم وزيت وفلفل لكحل جومبو ودجاج وكرافس ملح قع الخضر ديري منهم 2 حبات غير الزرودية كثري منها خليهم يطيبو وكي يطيب كلشي ارحيهم وعاودي رجعيهم على النار وديري كمشة نتاع شؤبة فارميسال وخليهم يغلو 5 دقائق مع التحريك وخلي دجاج مورصوات
وديري سلطة الارز وسلطة خضراء وزيدي كاش بوراك ولا سمبوسك
واذا ماعرفتيش كيفاش تديري سامبوسك قوليلي نمدلك الوصفة نتاعي

وزيدي كاش دجاج مقلي ولا لحم مقلي
الله يبارك تفوت روعة
ومور الغذاء حطيلهم الفاكهة اذا عندك واذا ماعندكش وجدي من قبل فلان ولا ياؤورت
وعلى 3 نوضي ديري قهوة حليب وحطي مع القاطو ولا ماعندكش وجدي رابيد موسكوتشو
ان شالله نكون افدتك

واذا جاوك للعشاء وجاوك من العشية غير يدخلو حطي العصير ولا قازوز والوقت اللي يشرلو فيه انت وجدي القهوة والحليب ومن بعد ديري عشاء نتاعك كيما قلتلك
يخرجو انشالله فرحانين من عندك