[هديل الحمام]

الله يصبرك يا اختي ما عندي ما نقولك من غير هذا الشي
من غير الصبر ماعندك ما ديري
في الحقيقة كاين بزاف امهات يغيرو من كناتهم ويحبو يضايقوهم باي طريقة وما خلوهمش يعيشو حياتهم بحرية ودايما يحسو الكنة انها دخيلة في الاسرة رغم هذا ما يعجبهمش الحال اذا راح وليدهم يعيش وحدو بعيد عليهم وعلى المشاكل
ويقولو الداتو
يحبوا الكنة تقعد معاهم باش يسودولها حياتها بالعاني لا حيا لا حشما
وانا ننصح كل كنة تعاني من هاذ المشاكل انها توسع خاطرها وتتحسس كل من يجي يقلقها انها فايقة بنواياه السيأة وبشئ من الصراحة والمزاح تقدر تحل المشكل في الحين حتى ما يتراكموش عليها المشاكل
المهم نحكيلكم على روحي
انا قبل الزواج كنت على بالي بلي عجوزتي واعرة بزاف وتحب ولادها غير ليها
بصح بعد الزواح الحمد لله ماعندي حتى مشاكل احيانا فقط يكون هناك بعض الحساسيات بصح انا نحترمها وجامي نردلها كلمة مهما يكون احيانا تحب تفرض عليا رايها وتحبني نعيش على هواها
ما نكذبش عليك نتقلق بزاف ونبكي ونهبل بصح بيني وبين روحي ولا واحد يعرف واش راني نعاني حتى زوجي نخليه بعيد ونتحمل كل شي على جالو علابالي يماه يماه ومرتو مرتو واش يدير مسكين الا دخلتو فالحكاية هاذ الشي ما يزيد غير الطين بلة
وعلا بالي بلي ربي يفرج مهما طال الحال ومهما طالت المعانات
ويوم لك ويوم عليك
وفي الاخير ننصح الشباب الي قادر يدير دارو وحدو من نهار الاول خير لو
وهاذي هي الدنيا بلا مشاكل عمرها ما تكون حلوا
وشكرا