[شمس 15]

السلام عليكم ورحمة الله وبركاته,
أنا حبيت نرد على لي قللو من شأن الأم و خسرولولها ماشي هكذا أنا راهي داقتلي فبلاصتها هي جات تطلب نصيحة ماشي تسمع كلام لا يليق,بالاك لوكان حكاتلكم وضعها تعذروها ساعات الأم تكون عايشة ضغط ما تعرفش كيفاه حتى ضربت بنتها و هذا راجع للمشاكل و الضغوط لي عايشينها و الأغلبية الأمهات تلقاهم ما يجوبوش ولا صابرات و مخبيات الهم فقلبهم يفشو زعافهم فولادهم ما يحس بالجمرة غير لي عافس عليها.
أما جوابي ليك أختي ساعفيها برك و كي تشوفيها قلقاتك أخرجي من الشامبرة لي راهي فيها بعدي عليها غير بش متضربيهاش.هذا وقتها تحب تفرض روحها عندي وليدي قد بنتك و راني غير بلعقل معاه أنتي أشكريها بزاف كي تسمعلك و دير حجة مليحة و جازيها بحاجة تحبها أنا ساعات نقولو دير حاجة ما يسمعليش بصح كي نقولو وليدي عمري حبيبي من فضلك يطرا و يديرها سبحان الله.
سايسيها حتى تقفل 5 سنين و تستعقل حتى تحيري كيفاه تبدلت لخطرش فهذ لعمر تولي تقرا تولي لاتيه و مركزة فقرايتها.
و نزيد نقولك ما تزيديش تضربيها عمرو لكان الضرب حل بش تسمعلك ملايين الدراسات تؤكد بلي الضرب مش حل تماما.و تفكري دايما قبل ما ترقدي نفسيتك كيفاش تكون كي تشوفيها راقدة و تتفكري كيفاش ضربتيها و زرقتيلها لحمها مشي محال ساعات توصلي تبكي على ضربك ليها. ربي يحفظهالك و يعقلهالك و تكبرلك و تخرجلك ماشاء الله.