- بسم الله بديت وعلى النبي صليت وهدي البوقالات عليكم نويت:
محمد يامحمد ماسبابي غير محمد طويل الرقبة مربوع القد ماولدوه إلا اللي لابسين الفيلالي تمنيت من الله يكون هو سعدي و حلالي.
- بنتي يا بنتي اجعلي السترة لباسك والحرمة فوق راسك تعيشي في أمان وتتفتحلك بيبان الخير والحسان، وتتعمر دارك ،هذا كنز يورثوه ولادك.
- ليلة من الليالي وأنا قاعدة حزينة خرجلي بدر الليالي قالي يالعدرة واشبيك حزينة إذا بيك على الحبيب الليلة يجيك وهو راه متفكرك ديما.
- أمليت كفي بالحنة وقلت يالحنين,شميت انسايم الجنة قالوا الأحباب راجعين كي صبرت نستنى مسحولي دمع العين.
- عيطت على سيد الملاح صبت الناس رقود هزيت الدالية طاح منها عنقود قالت النجوم نحكي وقال القمر ندوب اصبر ياقلبي ياك كل شيء بالمكتوب
- قمري قمري مهما تغيب وتروح محنتك ديما في قلبي ونبقى ديما نستنى وقتاش يطلع عليه هلال عيدي باش نبشرو ونقولوا مرحبا بيك يا سيدي.
-نهار الجمعة والشمعة في يديا رحت للجامع والدمعة في عينيا صبت الإمام يصلي على زربية قام وقالي واش بيك يالبنية قلتلوا الدنيا غرت بيا قالي ماتخمي وكوني مهنية اطلبي ربي صبح وعشية حاجتك تنقضى وتولي ليا
- السمرة يالسمرة يالي حلوة كي التمرة عينيك شهلة ولسانك جمرة نحلف باليمين غير أنت اللي نديك يالقمرة.
-شجرة اللوز تنهز بالعالي قلت لحبيبي بالاك تنساني قالي والله ما ننساك راكي في بالي بعثتلك سلامي في الماء يبرق وبعثتلك نجومي في السماء لزرق لوكان عرفت الزمان يفرق نكوي قلبي قبل ما نغرق
-يا لعزيزة الله يرضى عليك .. ديري الحنة في يديك .. و زيدي رجليك .. وستناي ربي يفرج عليك .. يجي الحمام لبيض يبشرك .. و الغزال يديك .. و تفرحي .. و يفرحو والديك
- الي ابغاتو ابغاها ...ولي اتمناتو لدارو اداها ...برضايت باباها... سعدها كي الشمعة يضوالها... ولي تفرحلها اتروح موراها او تدي الي ابغاها...
- دايرلي عساس علي الباب باشميطمعوش فيا . انا بعتلوا قلبي يحرسوا ,يخليه ربي ليا
- الفجر بنورو تبسم ... و نجم الهناء بان مع شمس الصبيحة... عيني شافت لبعيد .... حبيبي جاني نهار العيد ... مزين القلب اللي عطاه ربي حبيب كيما حبيبي....و مزينها قعدة مع لحبيب في هاذ النهار السعيد
مشكورة أختي على البوقااااالات