السلام عليكم قاطو الطبقات عملتو البارح
هو عبارة على قاطو بارد ب3 طبقات انشاء الله يعجبكم
نظرا لطلبات الاخوات نحطلكم الوصفة ومداقو روعة روعة والشكل انتم اللي تحكمو عليه
الطبقة الاولى كيلو كاوكاو منقي ومحمر ومرحي متوسط+3علب قاطو كاسكروت مرحي غبرة+3ملاعق كبار كاوكاو وتلمي بخليط من زبدة دايبة وشوية عسل وشكولا سوداء نتاع الميزان دايبة وادا ماتلمش كملي بماء الزهر وحليه في بلاطو وخليه يجمد شوية الطبقة التانية حلوة الترك فتتي كمية مليحة فوق الطبقة الاولى وغطيها بكيس بلاستيكي وحليها بالتساوي بزجاجة او الشوبك حتى تتحصلي على طبقة متساوية
الطبقة الثالثة عبارة عن شكولا بيضاء دوبتها مع شوية ملون وغطيت بيها الوجه وكي تجمدت شوية عملت خطوط متعرجة بالفرشيطة ودرت البيستاش والملمع البنفسجي وفي الوسط 4حبات من بيبيت دو شوكولا او حبيبات الشكولا
اي استفسار انا في الخدمة