مساء الخير اخواتي واش مدايرين في الايام الاخيرة من رمضان باين راكم مع القاطو وعلى هاديك حبيت نقولكم على وصفتي الساهلة المهم ما نطولش
المقادير:
كيلة زيت
كيلة زبدة ذايبة
كيلة حليب
و الفرينة
الغرس منقي و مرحي
وحدة بيمو مرحي
الطريقة :
تخلطي المقادير السائلة و تشيحي بالفرينة حتى تتكونلك عجينة تبسطيها بالحلال و بكاس تقطعي دوائر تحكمي كل دائرة تحطي فوقها شوية تاع الغرس على شكل حربوش او دودة المهم بعدها تلفي العجينة و تشكليها كيما قرن غزال و ادخليها الفرن حتى تتحصلي على اللون الذهبي كي تخرجيها تغطسيها في العسل أي الشربات و ترمديها في القاطو بيمو مرحي صدقوني اذا جربتوها راح تعجبكم و بالصحة و الهنا