وباش ماننساش نقولكم حاجة : ضرك تشوفو مع بداية السنة تبدا هاذي لامود تاع الدروس الخصوصية في الإنتشار ، بالنسبة ليا أنا تبانلي عادت عناد ، والله ماراهي لازمة ، واللي يحب يقرا صح الشرح تاع الأستاذ في القسم + الأنترنت + المجهود الخاص = نجاح أكيد
مثال ذلك : أنا تحصلت على معدل 16.20 هذا العام ن ماشي رايحة نقولكم بلي راهو معدل مليح لأنو كاين اللي يجيه قليل لكنه مرضي نوعا ما
ونقولكم بلي والله جامي في حياتي ما درت لي كور ، من الأولى ابتدائي لهادي الساعة ، وواش صرالي : تعبت وقريت إذن لقيت ، رغم أنو كان عندنا شهرين ماقريناش الرياضيات بسبب غياب الأستاذ ، يعني كنا متخلفين بين جميع الأقسام في الثانوية لكني اجتهدت وحدي وتحصلت على 17 في الرياضيات
الفكرة اللي حبيت نوصلهالكم : ماتحطوش في بالكم أنو اللي مايديرش لي كور ماراحش يدي الباك ، على العكس كاينين اللي دارو لي كور في جميع المواد وفي الأخير ماجابوش الباك
المسألة راهي مسألة إرادة واجتهاد لا أكثر ، واللي يحط حاجة بين عينيه من بداية السنة ويتمنى يوصللها + يتوكل على ربي ، صدقوني رايح يوصللها في الأخير
ربي يجيب اللي فيها خير ، وكاشي ماتحتاجو راني هنا ، طبعا إن وافقت الأخت صاحبة الموضوع على تدخلي