شوفي اختي امك فوق الراس و العين و مكانش كيما رضايتها مي ماشي معنتها كل كلمة تقولها راهي صح و لا قانون و لازم طبقيها انتي راكي تقولي انو خطيبك راه انسان مليح و ماراهش يقلك هذا الكلام باه يحكم فيه هو يخاف عليك و من حقو انو يقلك ماتروحيش للبلايص الي مايعجبوهش و يكون فيهم الاختلاط و هاذي حاجة تفرحك لانو الراجل الي يخلي مرتو تتسكع في الشوارع و مايغيرش عليها راه يتخاف منو .و زيد هو ماراهش يقلك حبسي روحك في الدار و ماتروحي حتى عند واحد على هكا اختي ادي براي راجلك و باباك اما امك خليها تهدر و منبعد كيما تلقاكش تتصنتيلها راح تسكت وحدها و ماتهدرش في الموضوع لانو امك راهي تهدر من منطلق مفهوم تاع النسا و الي هو لازم انتي الي تحكمي في الراجل ماشي هو و راهي تقول بلي كون يحكم فيك في داركم غدوة كي يديك من باب الدار ماطليش مي انتي راكي عارفاتو كثر منها و منا و كون باباك مايعرفوش مليح كون ماقالكش ديري واش يحب .ايفيتي المشاكل الصغار و الي بلا فايدة و تاني اختي بلاكي تقوليلو واش راهي تقلك باه ماديريش حاجة ماشي مليحة بينو و بينها و تاني باه تريحي من تكسار الراس و المرة الجاية كي تبغي تروحي لبلاصة هو مايبغيهاش قوليها انا مانيش باغية ماشي شرط لازم تقوليلها قتلو و مابغاش باه تايفيتي الهدرة على روحك