[اسعى لرضى الله]

المشاركة الأصلية كتبت بواسطة sihem30

شكرا لردك ، الطلاق راهو كاين يا اختي ؟ كاين رجال متدينين بصح طلقوا نساءهم لانهم فشلو معاهم ؟ العلاقة الزوجية تحتمل الفشل و النجاح بصح احنا نقولو ربي يكملها ... و يوفق ..

النقطة الثانية : مليح كي يكون للمراة ذمة مالية مستقلة لان في الاسلام جعل الذمة المالية للمراة مستقلة عن الذمة المالية للرجل و هذا الشي يخلينا نعرفو بلي المراة من حقها تعمل شرط انها ما تهملش مسؤوليتها اتجاه زوجها و اطفالها .. السيدة خديجة رضي الله عنها كانت تاجرة و تعمل و كان الرسول صلى الله عليه و سلم يعينها في عملها و انجبت منه ابناء و بنات ... السيدة زينب اعتقد اذا مارانيش غالطة كانت تعمل في بيتها .... المهم هناك اللكثير من الاعمال الي ممكن تعملهم المراة على الاقل نهار تحب تتصدق و تزكي و دير الخير تلقى دراهم من ذمتها المالية نتاعها ينفعوها في قبرها .. و تقدر تعاون ولادها اذا احتاجو لحاجة و ما قدرش راجلها يوفرها .... كاين رجال لاباس بيهم بصح ما يحبوش يوفرو كل حاجة للمراة .و للدراري حسباتلهم كي يولفوها بالمصروف رايحة تتقلش اكثر و ما تقدرش تتحمل المسؤولية و هدا غلط .... و الي قدرت تقعد في الدار و الله غير راهي كووورااااجججج ربي يعطينا من قوتهااا خاطر اذا لقات المراة خدمة تستاهل ما تراطيييهاااش خييييررررر يعني ما تراطي راجلها ما تراطي الخدمة الي تسترزق بيها و تحس بلي تقدر دير حاجة لروحها ...

و النسا نتاع بكري نظن كانو الله غالب عليهم يخافو من ازواجهم و عايشين تحت رحمتهم و تحتاجو و تخاف يخليها و تعيش تمثل عليه دور الحب او الطاعة المكرهة ... ماشي طيعو و هي حابة طيعو بالاكراه و كاين الي كانو بنيتهم و نجحو و كاين الي كانو يديرو دراهم مور رجالتهم ..... على بيها مليح المراة ما تطمعش بزاف في راجلهااا مليح كي دير المستقبل لروحها و يلا طاحت في راجل مليح و يعرف ربي ماكاش كيما هي راهو ماراحش يبخل عليها بحاجة و ما راحش يآذيها ان شاء الله شكرا على فكرتك و اتمنى لكي التوفيق عزيزتي .

يا اختي الطلاق صح كاين مقلناش مش كاين وهدا مش موضوع الاخت اللي طرحاتو كي تطلق اي ساهلة تروح تخدم
وزيد الطلاق في وقتنا وين كثر كي كثرو دعاوين الشر وكثر الخبث والنية مكانش بكري ويييييييييييييييين تسمعي بلي وحدة طلقت ونسا بكري يصبرو مي تاع دك ميجيبلهاش كيلو سكر تلقاها عند باباها المهم مكان لاه نخرجو على الموضوع
زيد اختي اقراي ردي مليح على اللخر واش قلت قلت منيش ضد عمل المراة بشرط يكون في الدار مثل الخياطة او بيع القاطوات بزاف حوايج وكي يكون في بيتها احسن يعني راهي تقفض دارها وقايمة بيها وبولادها وبراجلها خير ما يكون لبرا ويكون اختلاط
اما على ذمتها المالية يا وتصدق منها وتلقاها في قبرها انا نقولك يا اختي مال راجلها هو مالها ثاني لا سما هي عندها مالها وراجلها مالو وحدو سما هدي رجعو جيران مش زوجين وثاني كي يمدلها راجلها مصروفها تصدق منو نورمال اما في ما يخص كاينين رجال قادرين ولاباس بيهم مي ميوفروش واش تبغا مرتو هداك يا اختي منسميهش راجل وهداك اصلا كوني هانية ميقولش لمرتو حبسي خدمتك مادابيه تخدم وانا واش كتبت في ردي وواش رديت عليك قصدت راجل باتم الكلمة واعاودي اقراي ردي مليح راه لفوق واش قلت اما المراة اللي تقعد في الدار راهي كوراج ماهي كوراج ماوالو هديك هي بلاصتها الصح وزيد مش قلنا متخرجش خلاص تخرج تحوس تعيش حياتها نورمال مش تدفن ومش العمل مقياس بلي راهي مدفونة
اما نسا بكري نقولك والله كانو يشتيو رجالتهم ومش قضية خوف ولا لالا قضية دين وخوف ربي قبل متخافو هي وكانو يخدمو بحديث من صامت شهرها وصلت فرضها وأطاعت زوجها وحصنت فرجها دخلت من أي باب من أبواب الجنة شاءت, وزيد جامي كانت طاعة الراجل ذل للمراة بالعكس كي تحترم راجلها وطيعو ربي يرضى عليها

كانت الجنة هي مبتاغهم قبل الدنيا عليها وفقهم ربي

ونزيد نقولك يا اختي العزيزة في وقتنا قلت النية وكثر الخبث الطفلة تجي تزوج حتان تقعد تخطط وكون يديرلي وكون يصرالي ومنخليهش انا يتحكم فيا ووو ومها من جيهة وباباها من جيهة وخوالها جيرانهاويكثرو التدبيرات وكون يديرلك راجل هكا متسمحيلوش ديراكت لدار باباك مكيش مطايشة و راهي دار باباك كاينة ,,,,,,, الخ من النصاح الجهنمية

قليل وين تلقاي اللي يهدي للخير ويحط الرحمة ويحاول يزرع في المجتمع انو الزواج هو اجمل شيء في حياة الراجل او المراة ادا عرفو كيفاش يعيشو ويتفقو

حتان ترجع تبان رايحة للحرب مش راح تزوج باش ترتاح ومش راح تعيش مع زوجها قول راح تعيش مع براني وهدا سبب الطلاق

كون كل وحدة تفوض امرها لله وتجعل زواجها بعد طاعة لربي سبحانو صدقيني اختي ربي يوفقها
وبادن الله ميكونش طلاق كي تكون القاعدة صحيحة لانو تبالي مش راح تزوج في الظلمة تبالي راح تكون فترة خطوبة ويتفاهمو وتشوف اسكو يتوافق معاها وقبل كل شيء تصلي صلاة الاستخارة واللي توكل على ربي مستحيل يخيبو

وانا من جيهتي راجل تجيه نورمال تخدم مرتو يعني ميغيرش ولا مغارش يعني ميشتيهاش ويرضى اي واحد يلوحلها الهدرة وعاكسها

ونسيت نعلق على خديجة رضي الله عنها وعملها ونقولك يا اختي وقت الرسول صلى الله عليه وسلم مكانش كي وقتنا وماكانوش الرجال يلوحو الهدرة ويعاكسو وكان الاحترام ومكانش الفتن مي وقتنا الفتن غير هيا مالا الاحسن تحكم المرا دارها كما قالهم جحا داري تستر عاري