اسم العضو/ريان برهوم
اود ان اسجل في المسابقة
خاطرتي/
قصة اليتيم الزوالي
واحد لــــيوم راجع لـــــدار *** تلـــقيــتو في طــريقي جـــالـس
وجـــهو شاحب و مصــفار *** هـــم الدنــيا بــراســو كــــدادس
راســــو أشـــهب بالغــــبار *** و قشو مهلهل راضي و خانـــس
رجـــيلاتو حافيه يا ســـتار *** يلاوي الحـر و البـرد القــارص
قـُـدامـــو ناشــــر فــــــولار *** مــاد ايديــتو يحــلل و إيسايـــس
واحـد يحــن يعطيه ديـــنار *** و آخرحاطـــو صغير و فــالـــس
سامـــيتو وقلـــبي منـــــهار *** و إيـــدي فِـ راسو بـــيا آنــــس
و قتــلو سنك راهم صــغار *** يا ولـــــيدي تقــــرا لكـــــرارس
هــــذي خدمه تجيب لمــرار *** خــــبرني بأحـــــوال الفــــارس
جاوبـــني مـــذبل لشــــــفار *** قصـــتي مريره فيها قــصايــص
قلـبي ينـــــين خــلا لــــــثار *** حــكايتي بدت اســـمع يا رايــــس
سماني بابا عـــــرف يختار *** ما نقــــرا مــا رحــــت مـــدارس
و راح علــينا ضـــو الـــدار *** خــــلاني عـــلى نصــي كابــــس
ســني عــــشره مـن لكـــبار *** متســـول مـن ســـني الســـــادس
انعيش أخواتي راهم صـغار *** انـــزهي وجــــهم كي لعــرايـس
أمــي مـريضــه بسبــــيطار *** طــــال مرضــها حالها بايــــس
نطــــــلب ربـــي يا قـــــهار *** يشــفـيها مـــن كـــل لمـــــقايــس
متحـــمل اهــــموم كبـــــار *** نجــــول رواد مــاني حــــابــــس
هذي حــــوالي طــول النهار *** ديــما نزغــــدو كـي لخـــنافــــس
اللحــم نشــمو عـــــند لجـار *** عايش بمـــاء والخــــبز اليابـس
أنا فقـــــير مـاني مشــــرار *** و المـجــــتمع بحـــالي خــــانــس
نطــــلب قوتي ما شو عــار *** وقــلب حنــيـّن بـــينا إيـــسايــــس
ونتمنى نقــرا نكون طـــيار *** نــــدي لبــاك ونزيـــد ليــسانــس
عـقــب عليه واحـــد بهــبار *** لاحــلو بكــــلـمة كي لمشاكــــس
وصــفو بيها شـتم و الـعار *** طــبس راســـو تـركــو غايــــس
قلبي تمحـــمح شاعـــل نـار *** ضــميـتو لـــيا شفـــني عـــابـــس
خرج زفـــره مــن لــــقرار *** تتشق لقلوب ،تـُرجــــف لفرايـس
الدمــعه جمــدت كي لحجار *** وعـــينو حــمارت كي لقـــبابـص
تلــفـتـلي يشـهــق منـــــهار *** و جــــاوبني بكــــلام مقايـــــــس
قــالي اســــمع يا لمسـْــرار *** واش انقـــــلك ربـــــي يسايــــس
إتّواضــعْ في لعـين تكـــبار *** يعــــلي الشان ويصــون نفايـــس
و التفاخــــر يــدي لــــــنار *** طــــريقو مشـــوكه فـــيها دسايس
مجـــتمــعنا راح انـــــــهار *** ذاب الصـــــدق مــــع لعـــفايــــس
تقالــيدنا تبـــكي لمـــــــرار *** القــندوره ويــني راحت حلايـــس
جــــيلنا تبـــدل في لفـــكار *** إلـبس لاامـــودا تـــرك لبـــرانــس
شــعرو واقف كي لمسـمار *** سروالـــو طــايح بي لبـــخايـــس
النسوه ما طـــول في الـدار *** عند صـــايغ تشــــري مسايــــس
و الطـفله مصــــورتذكـــار *** ســـوق نســــوه فـــيه قصــايـص
للقــزنات يكــــشفو لســرار *** و سيدنا الشــيخ يكتــب طلامــس
في لقاعــــات غنا و شــعار *** السهرة مخلطه معيز وعـــتارس
راجــع مع طـــلوع النـــهار *** يخــسر فلـــوسو ماهـو حاســـس
حــــال الدنــيا حــالـــو دوار *** مره زاهــي و مـــره اغـطايــس
سمعت بجيلكم منين صــغار *** تلعـــــبوا خاوه فكــل لبــلايــص
لحـرة قايــمه وســــط الــدار *** في عين الراجــــــل هـي رايــس
الــزوالي زاهـــــي نــــــوار *** و اليـــتيـم درجـــاتـو فــــــــارس
متحـــدين خــــاوه أحـــــرار *** مبـــهاكــم كفــــــرخ الطـــــاوس
هذي حكايتي كـــان وصـار *** عـــارف فيها نكـــــــــد و نغايـس
هشام هشام راويـها أشــعار *** شــهر أفريــــل ليــوم الســـادس
عام ألفـــين و زيـــد مـــقدار *** بثـناش سنه تمــت لقــصايص