[faizarbh]

السلام عليكم أحبتي الكرام
بما انو رانا في وقت الفراولة حبيت نشارككم بهاد الوصفة الرااااائعة نتمنى تعجبكم

le fraisier



المقادير:


كريم موسلين:
انا معتمدة وصفة فلة
كريم باتسيير:

*1لتر حليب +3فناجل سكر عادي+ 2 فناجل مايزينة +2 بيضات +250غ زبدة فلوغيال +5ملاعق كبار لافاني
ندير الحليب يغلي مليح ثم
نضرب البيض مع السكر و المايزينة و الفاني ثم نبدا نزيدلهم فالحليب يغلي غير بشوية و نضرب باش البيض ما يطيبش ثم نديرهم على النار و نبدا نحرك حتى تعقد الكريمة جيدا و نضيفلها ملعقة كبيرة زبدة طرية انحيها من 250 غ




ثم نفرغ الكريمة في بلا باش تبردلي بلخف و نخليها حتى تبرد ملييييييييييح مليييييييييييح
لما تبرد نضرب الزبدة (200غ) نضربها جيدا حتى تولي بيضبء و نبدا نزيدلها فالكريمة غير بشوية و نضرب حتى نتحصل على كريم موسلين شادة روحها و ندخلها الثلاجة تبرد شوية.







نحتاج جنواز:

ممكن تستعملي اي جنواز تستعمليها انتي انا استعملت الجنواز اللي معتمدتها لأم رامي
6 حبات بيض + كاس سكر + فاني + كاس فرينة + نص كاس مايزينة + ملعقة صغيرة خميرة حلوى
نفصل الصفار على البياض
نطلع البياض مع رشة ملح حتى يولي كالثلج و نزيدلو نص كاس سكر و نضرب .
ثم نضرب الصفار مليح و نزيدلو الفاني و نص كاس سكر و نضرب جيدا حتى يذوب السكر و يولي الخليط على شكل كريمة
بواسطة سباتول او ملعقة خشبية نبدا نضيف فالصفار للبياض على 3 مرات و نخلط برفق من تحت لفوق بعد ذلك نخلط الفرينة مع المايزينة و الخميرة و ننخلهم في سيار او صفاية كبيرة و نضيفهم للخليط على 3 مراحل و ايضا نخلط برفق من تحت لفوق .


انا قسمت الخليط على اثنين و كيبتو على شكل بيسكوي رولي
لاحظوا الصور





طيبتو على ورق طبخ و لما طيبتهم الاثنين و خلتيتهم بردو قسمتهم بمول تاع قلب و انتي و واش متوفر عندك


صلصة الفراولة:
كمشة فراولة مقطعة + شوية سكر (حسب الذوق) نديرهم في كاسرونة على النار و نخليهم يطلقو السيرو و يدخلها الطياب نزيدلها شوية عصير ليمون باش تحافظ على لونها ثم نرحيها جيدا بالميكسور
(هاد الصلصة ممكن تصنعيها و تخبيها فالمجمد لوقت الحاجة و ايضا تحبي تستعمليها فالتحليات او مع المثلجات او في التارت كيما تحبي )







انا ضفتلها 2 ملاعق صغار جيلاتين بودر و رجعتها على النار حتى ذابت الجيلاتين .




التشكيل:
نحط طبقة جنواز و مع الأطراف نستف الفراولة بعدما كنت قطعتها شرائح



و عملت ايضا في لي مول الصغار



ثم نشرب الكيكة بسيرو باش اجيني طرية
ثم ندير طبقة كريمة موسلين و نزرع فيها حبات فراولة ههههه




ثم نزيد طبقة بالكيكة الثانية و نضغط شوية عليها باش تدخل مليح و تخليلي مساحة الفوق باش ندير الصلصة


ثم ندير الصلصة و ندخلها المجمد تشد روحها جيدا و تتماسك



بعدما تشد روحها مليه نخرجها و نفوت السكين على الأطراف بحذر و ننزع المول برفق و راح نتحصل على هادا


و نزينها بحبات فراولة من فوق او كيما تحبي و انتي و اللي يعجبك

ملاحظة: ممكن نعوض طبقة الصلصة بعجينة اللوز أو عجينة السكر.




نتمنى تعجبكم الوصفة
مع السلامة