[ريمه]

السلام عليكم
البارح عملت تيراميسو بدون ماسكاربون
عطاتلي هذي الوصفه صديقتي عزيزه عليه وبينومتي تاع الميموار هههه
نشكرها بزاف وحبيت نتقاسمها معاكم
هي وصفه سهله وسريعه نحتاج
علبة قاتو خاص بتيراميسو شامباني انا استعملت المستورد من ايطاليا راح تشوفو صورته
علبة تاع 150 غرام كرام فراش هو لي راح يعوض الماسكاربون
3 بياض بيض
ملعقة صغيره فاني
اثنين ملاعق تاع سكر رطب انتي وحسب الذوق نتاعك ما تحليهش بزاف
كاكاو
كاس قهوه حلوه (انادرت لمستي الخاصه عملت نسكافيه وزدت عليه ملعقة كاكاو يجي بنين اكثر )

للتحضير
نضرب بياض البيض مليح مع قرصة ملح حتى يصير ثلج

نضيف فاني وعلبة كرام فراش والسكر ونخلطوه مليح


نجيب القاتو الخاص بالتيراميسو ونشمخوه في القهوه ونخلوه في صينيه ولا مول


نحط كريمه من الفوق ونرشوه شوي بالكاكاو


نرجع نحط القاتو المشمخ والكريمه ونرش بالاخير بالكاكاو
يعني نعملو طبقتين مره قاتو مره كريمه



نخليه في المجمد مدة 4 ساعات والاحسن يرتاح ليله كيما خليتو انا



ولي تحوس على اذا كانت الوصفة اقتصاديه وما تخرجش بزاف انا انكولك
المجموع الكلي جانتي حوالي 30 الف ل 12 قطعه صغيره كيما الصوره
واذا درتي حسابك برا الوحده يقولك 10 الاف ايا انتي طلعي حسابك
نستنى في تطبيقاتكم جربوها راهي بنينه بزاف
وما تنساوش تدعولي انا وياها للسوتنوس تاعنا
وبالصحه والراحه