السلام عليكم حبيباتي و رحمة الله تعالى و بركاته
راني اول مرة نطيب لبراج و جاني واش نقلكم رووووووعة
كلمة روعة قليلة عليه
و هذا بشهادة الجميع درولي قصائد عليه ههههه
نخليكم مع الصور
و نتوما حبيباتي واش تقولو في براجي ؟
و الان الوصفة لي طلبوها الاخوات
اولا نبدا بالغرس نقيه و نرحيه اذا لزم الامر ثم نعجنه بالزيت و نضيف له شوي قرفة و قرنفل
العجينة : 3 كيلات دقيق - كيلة زبدة - ماء الزهر - ملح و ماء
نذوب الزبدة قبل بوقت و نخليها تبرد ثم نصفيها من الماء
ناخذ الدقيق في قصعة نضيف له الزبدة ذائبة و نخلط باصابع اليد نتحصل على خليط مرمل ننزع منه حفنة و نتركها جانبا
ثم نرجع للدقيق نحكه مليح مع الزبدة حتى يطلع بعدها نضيف الملح و نحله في شوي ماء الزهر و نضيف الماء و نخلط بالاصابع و نلمه ( نطمه ) بدون عجن طبعا
نغطيه و نتركه يرتاح
بعد ما رتاح نقسم العجينة على اثنين نحل الاولى على سطح مرشوش بشوي دقيق لي خلناه قبل : نعمل قرصة متوسطة و غليظة لاننا راح نحلها مباعد
ثم نحل الغرس على بلاستيك فوق صينية مقلوبة ( البلاستيك مذهون بالزيت ) نستعمل الزيت في اليد اذا لصقنا
ناخذ هذيك الصينية و نقلبها على القرصة الاولى - نحل الغرس على قد القرصة الاولى
نحل العجينة الثانية كذلك على بلاستيك على صينية مقلوبة قطرها قد العجينة الاولى و نقلبها على الغرس
نعدلها على الجوانب ثم نبدا نحلها من الداخل الى الخارج حتى نصل الى السمك المرغوب
نرشها من الفوق بالسميد المبسس الباقي و نحكه على كامل السطح
الان نبدا نقصها مقرودات انا استعملت طابع لبراج
نشعل الطبونة -الغاز- على نار خفيفة و نضع عليها طاجين لحديد لما نكمل القصان و يسخن الطاجين نبدا نطيب
انا استعملت الطاجين العادي تع لفطير فقط نقصي النار و خليهم يطيبو على مهلهم - لازم تصبري عليهم شوي - و قلبي بالشوي باه ما يتكسروش
بصحتكم حبيباتي