السلام عليكم
مانيش عارفة كيفاش نبدا المشكلة هادي ....
بابا ورغم كل شيء يبقى بابا ومانيش حابة نقول صفاتو ومانيش حابة نوصفو فقط كي جا بابا
بصح مانقدرش نجوزلو قع واش دار فينا !!!
المهم لازم تفهمو بلي شخص ظالم و ما يتعاشرش و اقل حاجة لازم يديرها كزوج و اب ما دارهاش
يعني باختصار ما يصرفش على الدار , يضرب مرتو لاتفه الاسباب حرمها من زيارة امها لمدة عشرين سنة او اكتر فقط السنة الماضية راحت تزورها لانو صرا مشكل فالدار مالا عمي صاب السبة وداها ....
ما يعدلش بين اولادو و كي كانو صغار يحاوزهم من الدار على جال اسباب تافهة جدا
ومنذ تقريبا رمضان الماضي بدا المشكل الاساسي الي جيت على جالو ..
بابا عندو فلليل يهدر باطل مالا موالف يعطي لماما تهدر مع لافامي وتسقسي عليهم و التيليفون تاعو فيه زوج خطوط
مرة ماما عيطت لعمتي و حبت تعيط لخالتي وهو كان راقد قاتلي عيطيلها مقبيل هدرت معاها
وانا مانعرفش مليح للتيليفونات وبالاخص تاعو ما عرفتش وين ندخل لليزابال ولا لي كونتاكت قاعدة نسيي حتى دخلت لليميساج وكان ميساج اللول الي شفتو بعتهولو شخص باسم رجل والله والله والله دخلت بالخطأ للميساجات وبالخطأ أيضا درت اوكي وشفت الميساج ويا ليتني ما شفتو .... ميساج غرامي و'' حبيبي و عمري و توحشتك "
صدمة كبيرة جاتني ما قدرتش نأمن أو نصدق كدبت عينيا
وبما ان الاسم كان اسم رجل قلت ربما واحد من معارفو بعتتلو وحدة فالنيميرو تاع بابا بما انو يعطي للناس يهدرو بالتليفون تاعو فالليل قلت هادا احتمال ..
ومازدتش مسيت تيليفونو
وبعد ربما شهرين او اكتر ماما دايما تقولي عيطيلي على خاطر ما تعرفش للتيليفونات كي جبت نعيطلها لقيت لابال تاع الاسم الي قريت الميساج تاعو !!!!
عرفت بلي هو خصوصا كان الاتصال قريب يعني قبل بيوم او في نفس اليوم نسيت بالضبط كيفاش
تماك انا بديت نصدق بلي ممكن يكون هو مالا المرة التانية دخلت قصدا لليمساج و بديت نحوس على ميساجات الاسم هاداك و بديت نشوف العجب " توحشتك و بون نوي و بون اني و ووووو" ما هدرت والو ما بينتلهم والو وخليتها في قلبي ....
لكن غير كيما كنا في دار عمي كان التيليفون عند بنت عمي هدرت بيه وممبعد جات تعطيه لبابا كان حبط برا وبما انو كنا رايحين حبطتو معايا زدت نشوف اسكو مازال على اتصال بيها او لا وهادي غير كيما باش ما نظلموش برك ..
وهاد المرة شفت لي ميساج تاوعو صدمة اخرى اكبر واكبر ...
هنا بكل صراحة انا زدت كرهت الانسان الي قدام الناس بابا لانو من قبل كنت نكره طبايعو و افعالو و عدم تحملو للمسؤولية لكن اليوم كرهتو نهاااااائيا
ماعرفتش واش ندير ؟
علابالي بيه في علاقة مع مرا على الاغلب تكون متزوجة .. ما كان حتى شي يربطني بيه من غير الدم وصلة القرابة
ما صرف عليا ما رباني ما علمني يعني واش من الفايدة كي راهو في حياتي قدام الناس بابا ...؟؟؟
بكل صراحة انا نكره بابا و فقدت ثقتي فالرجال كااااامل
علابالي بلي كاين رجال ملاح وصالحين و كلش لكن للاسف مانقدرش ندير ثقة في اي شخص مهما كان
وحتى لو درتها ما نقدرش نتحمل صدمة وخيبة مرة اخرى
بابا كسرلي قلبي اكتر من مرة لانه غير حنون غير مسؤول وكانه لقاني في شكارة وجابني لدارو بما انو ما عندوش لبنات عندو 4 اولاد ....
ماعرفتش واش ندير لوكان نقول رايحة نخرب الدار كامل ورح نفضحو هو و نفضح خاوتي و نفسي ...
نسكت غايضتني ماما الي كاتم عليها النفس والهوا وماتخرج ما تشوف ... انا يخليني نروح نشري من المارشي والسوق وهي ممنوع و امور اخرى بزااااف ما نقدرش نقولها قع لانو يبقى بابا مهما كان لكن بالنسبة ليا انا ماعنديش اب
وراني نخمم فالايام الجاية كيفاش رح تكون و وين رح نوصلو ؟؟؟
حتى ماعرفتش نعطيكم سؤال تجاوبوني عليه او تساعدوني بيه ؟؟:!!!!!!
الله المستعان