[ryhem 16]

أختي فايزة ما عندي ما نقول في كلامك و في فنك يا الغالية غير بارك الله فيك و ألي عندك و الله يسعدك يا الغالية مششششششششششششششكوووووووووووووررررررة يا بنت الأصل ما شاء الله عليك

هاهي وصفة الصابلي بالليمون و المورانغ
و الله كنت نخمم نبدل حلوة الصابلي بالمورانغ من نهار ألي خرجت أول مرة في بجاية
عزيزتي فايزة خسارة الصور راهي قديمة عندي حوالي 4 سنوات من ألي أخذتهم خاطرش عملت أشكال أفضل لكن للأسف ما صورتهمش المهم تلحقلك الفكرة يا أحلى فنانة

المقادير

• 500 غ مارغارين

• 4 صفار بيض + 1 بيض

• 1 كأس تاي من مايزينة(النشاء)
• 2 ملاعق أكل من الزيت
  

• قشور القارس
• لافاني
• رشة ملح
  

• 1 باكي خميرة نوارة

• 200 غ سكر غلاص

• الفرينة حسب الحاجة

المورانغ

8 بياض بيض
رشة ملح
800 غ سكر عادي

التزيين
كريمة القارس كاين نوعين و لكي الاختيار كما تقدري أديري سوبر كريم ذوق الليمون
ألي في الصورة كريمة القارس بالنشاء بصح ألي تعجبني و ألي نعتمدها هي ألي أطيب في حمام مائي

مقاديرها

• 3 بيض

• 120 غ سكر عادي

• 60 غ مارغارين

• 80 غ عصير القارس مصفي

• 1 ملعقة أكل قشور القارس

التحضير


العجينة
في اناء خلطي المارغارين + لافاني+قرصة ملح + السكر غلاص جيدا
زيدي الزيت+ البيض + قشور القارس ثم المايزينة
و في الأخير حطي الخميرة و لمي بالفرينة حتى تتحصلي على عجينة خليها ترتاح

• في نفس الوقت حضري المورانغ
  

حطي كسرونة واسعة فيها ماء و خليها تغلي

في اناء أخر ضربي بياض البيض + رشة ملح جيدا و بداي تزيدي في السكر بالتدريج حتى تكملي كيل تاع السكر

ديري الاناء في حمام مائي و واصلي الضرب الباتور حوالي 5 دقائق حتى تلمسي البيض و تلقايه كالمرهم و يلمع هنا تتأكدي بليك السكر ذاب كامل خرجي الاناء من الحمام المائي و واصلي الخفق حتى يبرد البيض و حطي المورانغ في لابوش أدوي

• أحكمي لعجينة نتاعك حليها و اطبعيها كما تحبي
  

• حطي العجينة في صحن الفرن و شكلي بالمورانغ فوق كل قطعة
  

• دخلي الحلوة للفرن ألي يكون مسخن مسبقا على درجة حرارة 160 ° باش احافظ الصابلي على لونو

• كي يطيب خليه يبرد و تقدري ترشي من الفوق بالسكر غلاص

• حضري كريمة الليمون

التحضير


في اناء خلطي بالمضرب اليدوي البيض + سكر + عصير القارس مليح
حطي الخليط في حمام مائي (الماء ألي طيبتي فيه المورانغ) و واصلي الخفق بالفوي(المضرب اليدوي) حتي يثقال

نحيه من الحمام المائي و واصلي الخفق مع اضافة المارغارين مع قشور القارس و خليه يبرد
ضعي الكريمة وسط الحلوى

نتمنى الفكرة وصلاتك حبيبتي فايزة