نفس المشكل اللي كان عند الاخت
يا اختي اول حاجا شوفي اخلاقو اذا كانت مليحة اما الجمال والله مع الوقت ابنل ان شاء الله اجمل
كي تصلي صلاة الاستخارة لاوم ترتاحي ونتي اذا شفتيه انسان ذو اخلاق روحية الاحسن متفرطيش فيه واذا كان هو من جهتو حابك كيفكيف والحاجة الثانية الاهل تاعك
انا مخطوبة ودك نقنعك بلي صرالي انا
انا مثلا في البداية عرفتو 3 سنوات كل مرة اقولي نجي نخطب تعرفي الجواب تاعي واش كان لالالالالالالالا
والسبب اللي راكي حاسا بيه كنت نشوفو ماشي شباب مع العلم والله مخصو والو اللي اشوفو اقولي ما شاء الله اخلاق وجمال ونزيدلك حاجا ماهوش شباب كيما راكي تتصوري عادي منبعد 3 مرة قالي راني ناويك هادي اخر مرة نزيد نعاودلك تعرفي واش درت؟؟؟؟قتلو خليني نخمم صليت صلاة الاستخارة والله غير ارتحت والحمد لله قبلت وجا خطبني وهدر ليماه عليا هدا قبل الخطبا وعيطلها وصقسيت عليها بعد مرور اشهر قليلة جاو خطبوني مع العلم الوالد مقبلش حتا شديت في رايي واقنعتو
والان راني اسعد وحدة وراني نشوف فيه اجمل واحد في هاذ الدنيا سورتو عقليتو ويصلي ويخاف ربي هاذو اهم النقاط اللي لازم تفكري فيهم ومع الوقت اذا حبيتي اخلاقو رايحة تشوفيه في نضرك اجمل واجمل مخلوق
قال رسول الله صلى الله عليه وسلم:"اذا اتاكم من ترضون دينه وخلقه زوجوه"
هنا مذكرش جمال الوجه بل جمال الروح
ومادام جا هو نواك هاداك هو الصح
ونتي مدرتيش في بالك بالاك اقول نفس الكلام عليك؟؟؟؟ولكن ديري في بالك الراجل عمرو ميتعيب يا اختي اتهلاي فيه مليح اذا كنتي متاكدة من اخلاقو متفرطيش فيه نصيحة من اختك سارة مع العلم في عمري 19 سنة مي ان شاء الله نكون افدك بشي وربي اهنيك ويرزق كل فتاة بالزوج الصالح ويخليكم لبعضاكم
متخافيش اجي نهار وين تشوفيه اجمل انسان
مي نصيحة اخرى متسمعيش لهدرة الناس وخاصة العائلة
مثلا انا كي جا خطبني وحد معجبو الحال وكل يوم نسمع كلام يجرح ويخلوك تبطلي زواج مي انا الحمد لله ربي معايا وهذاك هو الصح
احبك في الله واحب كل الاخوات
سلام