بسم الله الرحمان الرحيم السلام عليكم و رحمة الله تعالى و بركاته اخواتي العزيزات اليوم جبتلكم وصفة تقليدية من منطقة مسقط راسي و هي السويكة و هي عبارة عن طبق حلو يقدم للضيوف الي يجيو ايباركو للوحدك منا اذا زيدت وانا حبيت نفيدكم بطريقة توجادو و تحضيرو من الاول وان شاء الله تعم الفائدة لانه طبق صحي و مغذي نبدا على بركة الله المقادير قمح منقي و نظيف الكمية تكون كبيرة على حساب المعارف و الاحباب حمص مقلي و للتحضير و التقديم زبدة و عسل التحضير ننظف القمح من كل الشوائب الي فيه و اذا كنا في زمان الصيف نسوموه بالماء كيما الفريك و نخلوه يشيح مليح واذا كنا في زمان الشتاء نمسحوه عدة مرات بمنديل نظيف نقليه في طجين مسرح و على نار هادية حتى يصبح لونه ذهبي نخليوه يبرد و من ثم نرحيوه بالرحى انتاع الحجر او عند الي عندهم مطاحن تقليدية وبالنسبة للي تحب تزيد تنكهو بالحمص ثاني تنقيه و تقليه ثم ترحيه و تخلطو مع السويكة لكن دائما كمية السويكة اكبر 3 مرات من كمية الحمص ونقدموها في النفاس .نقوم بوضع الزبدة و العسل على النار حتى يتجانسو ثم ننزع الخليط من على النار و نظيف غبرة السويكة بالتدريج لازم تكون شوي جارية باه كي تشرب تجي سوى سوى ثم نزينها حسب الرغبة و شهية طيبة للجميع و نتمنى انو استفدتو بهذه الوصفة و حظ موفق للجميع