[ريم الفلى]

المشاركة الأصلية كتبت بواسطة تنهينان12

الله يبارك يعطيك الصحة
حبيت نسقسيك كيفاش عجنتي المطلوع عجبني بزاف باين بنين

صباح الخير يا لبنات شكرا على تقييمكم للموضوع اما بالنسبة لطريقتي في عجن المطلوع فهي طريقة امي الحبيبة ربي يعيشهالي
اولا منقدرش نمدلكم المقادير خاطر حنا نديرو عينك ميزانك
اولا لازمنا سميد من النوع الجيد
سميد وحدو حنا منخلطولوش الفرينة وهدا حسب عدد قرصات المطلوع اللي رايحة تدريهم وملح حسب كمية السميد وخميرة الخبز انا ديما ندير ملعقة معمرة بهاديك اللي تجي في باطا تاع حليب الاطفال هههههه وشويا زيت متكثريش لانها تتفتت كي تكوني تطيبي فيها وشينوج او حبة البركة كيما يسموه البعض
الان الطريقة:
بعد ما نكيل السميد والملح المناسب ليه نزيدو الخميرة وشوية سكر وحبة البركة ونخلط كل المقادير الجافة بيدي مليح من بعد نبدا نزيد في الماء الدافي ونعجن مليح نقطعو ونلمو وندلكو بيدي مليح وانا نزيد في الماء حتى يولي مطلوق من بعد نزيد الزيت باش ميلصقش في يديا ونلم العجين ونقسمو على عدد القرص اللي حابتهم ونديروهو في منديل ولا قطعة قماش مخصصة للمطلوع ونخلوهو يريحو شويا برك من بعد قرصيهم بيدك اي حاولي تحليهم بيدك حتى يولي رقيق كلما يجي رقيق يجي خفيف وبنين واقلبيها باش متلصقش في الطرف القماش وزيدي قرصي الدوزيام وحطيها فوق الاولى وهكذا حتى تكمليهة كامل من بعد غطيهم مليح وخليهم في مكان دافي باش يزربو يتنفخو ويطلعو ملييييح واحد الساعة غير لكن اذا كان الحال دافي رايحين يخمرو بيه بيه ملزمش تخليهم حتى تخرجهم لخميرة خاطر يجو يابسين وفارغين من الداخل مالا لازمك تعسيهم كي تشوفي الحجم تاعهم ارتفع وبدات علامات الطلوع تبان لوحي الطاجين من الاحسن تاع الطين باش يجي هشوش وبنين من بعد ابداي تطيبيهم لوحيها في الطاجين وكي تشوفيها تنفخت اثقبيها لانو هاداك الغاز الي نفخها هو في الحقيقة غاز ثاني اكسيد الكربون co2 مالا لازم كلما تنفخت نثقبوها باش نخرجوه كي تشوفوها بدات تنشف من تحت اقلبيها بسرعة واثقبيها وخليها تطيب مليح وتتحمر وتحوشيهم اي تطيبيهم من لحواشي تاني وبصحتكم مطلوع لذيذ والله انا ديما ندير حسابي على 3 مطلوعات نلقاهم كلاو 5 هههه بصحتهم
اه نسيت نقولك انو كمية الزيت متفوتش الفنجال