[عادل إن شاء الله]

ساعات الإنسان يحس بالوحدة وسط النّاس ،،،

ساعات الواحد يكذب و يخبّي و يقول لاباس ،،،

ساعات نكتموا أحزاننا و نخرّجوا ضحكة صفرا ،،،

ساعات بعد الفرح يجينا جرح على غفــــلة ،،،

قداش بكينا على فراق ناس حبّيناهم ،،،

و قداش ندمنا كي بكّينا ناس جرحناهم ،،،

هكّذا المكتوب تبكي قلوب تفرح قلوب ،،،

الواحد كلما يكبر يتعلم ،،،

حبّينا ناس ما يستاهلوش منّا لمحبّة ،،،

مع كلّ جرح جديد يزيد القلب يتعبّى ،،،

الوحدة قاسية سيرتو كي تكون مقهور ،،،

تتمنّى تشكي همّك و ماتلقاش لشكون ،،،

كل يوم يفوت يغيضك تندم عليه ،،،

شكون فينا ما يحبّش يرجّع الفرحة لعينيه ،،،

شكون فينا ما يتمنّاش لو كان يرجع صغير ،،،

يحب يدير الخير و ما يغيرش من حاجة الغير ،،،

و جرات بينا الدّنيا و كبرنا و كبرت همومنا ،،،

و البراءة قتلناها خرجنا النيّة من قلوبنا ،،،

عرفنا عباد خانونا ما لقيناش لي يصونا ،،،

يا الله سامحنا و على الحق بالله لا تلومنا ،،،

سامحنا كان بكينا على حاجة ماهيش تاعنا ،،،

سامحنا اذا تبعنا حاجات زادت في أوجاعنا ،،،

تقهرنا في زمان المادّة تسيطر على مشاعر ،،،

في زمان حنا المفعول و هي بينا الفاعل ،،،

فينا لي ضعف هاجر ناسو و تغرّب علّقمة ،،،

و لي يأس و في العرق غرس الحقنة ،،،

و لي بحبل إنتحر فارق أهلو و أحبابو ،،،

و إلي ولاّو بسيكوبات من صغرتهم شابو ،،،

خاف لا يصير لي كيفهم خاف من نهاية حزينة ،،،

إن شاء الله يبعّد الإبتلاء ربي يفرّج علينا ،،،

هاذي كلمات من القلب خرّجتهم ،،،

هديّة منّي للنّاس الي ذاقو طعم الفرقة ،،،

هاذي حلقة من مسلسل الدّنيا الفانية ،،،

هذا إحساس ناس أجراحها ماهي باينة ،،،

الدّنيا ماهي دايمة ما تنساش الله رحيم ،،،

أذا قسات عليك لحياة لعلاّ في الآخرة خير ،،،