اولا هذ العجينة لبتي فور تعلمتو ملي كنت نقرا في المتوسط تاع السيدة رزقي استاذتنا تعلمنا منها الكثير الله يذكرها بالخير مكوناتها 250غ زبدة 150 غ سكر قلاسي حبة بيض مغرف صغيرة خمارة الحلوى فاني قرصة ملح فرينة اظفت 100لوز محمص مرحي في العجينة طبعا طريقة العمل واضحة وكلاسيكية بالباتور نخلط مليح الزبدة والسكر ونزيد البيضة والفانيزيد اللوز والخمارة ونقسم الخليط نحبس الباتور بيدي نزيد للجزء الاول فرينة نتحصل على عجينة رخوة والجزء الثاني نزيد كاكاو والفرينة وثاني نفس قوام العجينة الحلوى الاولى نأتي بمول سيليكون الشكل و الطريقة موضح في الصورة كل حبة نحط فيها 6 كريات بحجم حبة زيتون بالتناوب مرة بعجينة بيضاء مرة بعجبنة بالكاكاو سوي السطح بشوية ودخليها للفرن تطيب هنا بعدما طابت انزعيها من المول ادهني بواسطة فرشاة بلاجولي او عسل ثقيل بدون اظافات مسخن شوية مسحة فقط وعمري الفراغات بشوكولا ذايبة وحطيها في ليكيسات وتقدم زوووووووووم الحلوى الثانية نفس العجينة الي بالكاكاو حشيتها حبة بندق محمص وشكلي كرية قد حبة الجوز وحطيها في مول سيليكون شكل اخر بعدما طابت غطستها في شيكولا ورشة بندق مرحي ممكن تغير الحشو حلقوم او سوغيز او عجينة بيضا او نوادكوكو مع شوية سكر وبياض بيض انت حرة ممكن حتى من غير حشو الحلوى الثالثة ودائما بنفس العجينة صابلي رولي هنا تستغناي على اللوز الي في العجينة فوق ورق بلاستيكي حلي العجينة البيضاء رقيقة وثاني الي ملونة بالكاكاو حطيهم فوق بعض ورولي غلفيها بالبلاستيك وحطيها في الثلاجة تحكم روحها نخرجها ونقصها بسكين دوائر بسمك نصف سم نسوس الشكل ونحطها في بلاتو والى الفرن تطيب ونليق كل حبتين بشوكولا وندهن الحواف بلاجولي وكاكاو محمص مرحي نتمنى تنال اعجابكم سلاااام