[{ توبة }]

و عليكم السلام و رحمة الله تعالى و بركاته
اهلا اختي نعمة عاش من شاف مشاركاتك
و كيف سيكون الحال و الدراسة يوم الاحد اكيد حماس توتر تخوف الى غير ذلك
ههههه و كيما قلتيها في السنين اللي فاتت كنا كي ندخلوا للمنتدى في هذه الفترة
نلقاو القرعيجات و اجواء التسجيلات و الدخول المدرسي لكن كما ترين هذا العام كل المواضيع دراسية
يعني بما اننا بااك منلومش اصحابها .. ~
امممم ندخل ضك لــ { صلب الموضوع }
في هذي العطلة و اللي هي اسمط عطلة في حياتي للاسف عقبتها في الدار يعني لا تبحيرة لا تحواس بسبب ظروف عائلية
اما الدراسة فحبيت اني نرتاح قدر المستطاع و للضــك مقدرتش نطل و لا نراجع حاجــة
و ساعات تلقايني نعفس على قلبي و نحمل ملفات و الامور هذوك اللي نحتاجها في القراية
و ثاني استفدت بزااف من نصائح الاخوة اللي عقبوا الباك قبلنا
* يوم التسجيل نهار الاثنين كان روعة و طحت في كلاسة 3 ع ت 1 في الحجرة 3 مع نفس تلاميذ العام اللي فات
و هذا اللي محمسني اكثر لاني نحب كلاستنا
* ان شاء الله نهار الاحد عندي مع الدخلة رياضيات او علوم نسيت .. ناوية نقعد مع نفس الطفلة اللي قعدت معاها العام اللي فات
الله يبارك طفلة عاقلة و تخليني نقرا في راحتي ناوية نحكم الطاولة الثانية او الثالثة لاني نكره الطاولة الاولى
* الجانب النفسي و الله انا حايرة في روحي ساعات هكذا ساعات هكذا قالولي الواحد كي يحط هدف قدامو رح يقدم وش عندو بباه يقدر يحقو ..
* الكلمة انا نحوس اللي يمدهالي هههههه منعرفش نطلع المورال
* و الله حسب ما قالولي رح يكون عام مليئ بالاحاسيس توتر فرح امل خوف ترقب صبر
و اكيد رح يجي اوقات نحسو فيها بالضعف و نفقدو الامل لكن ان شاء الله نتغلبو عليها بالارادة القوية
علابالي رح يكون بالنسبة ليا عام صعيب لكن الباك يستاهل كل هذا و ان شاء الله يكون افضل عام ليا
ان شاء الله منكونش هبطتلك المورال اختي نعمة
و سامحوني على الرد المخلط شوي فصحى و شوي دارجة :d
ملاحظة : نظن الصورة اللي في التوقيع من تصميمك ان كانت كذلك اسمحيلي اذا ديتها بدون اذن عجبتني و حفظتها من العام الماضي
و ان شاء الله ان شاء الله ميحذفش الموضوع
و شكرا لك على الموضوع .
سلام