واش نقلك يا اختي راكي تفوتي على نفسك نعمة كبييرة و فضل عظيم ،
راكي تفوتي لقــآآء مع الله ! كلآآم مع الله سبحانو بينك وبينو برك
نتي اضعف مخلوق و ربي سبحانو العظيم الملك الجبار
شكون نتي قااع ولا شكون انا باش تسعاي ولا نسعا لقاء خااص لوحدك مع ملك ملوك الدنيا !
الوزير ولا الرئيس والله ما تسعايها تهدري معاه ، لازم تهدري مع وزيرو و وزيرو مع وزير وزيرو حتى تدوخي وما تلحقييش
وربي ملك الملوك من بيده حياتك و موتك و قادر بامر -كن -تتقلب الدنيا وهو لي ينفعك ويضرك ويضحكك و يبكيك ،
هو لي كبرك ونجحك و حفظك و خلقك على احسن صورة و اسجد لك الملآآآآآئكة و خرج ابليس من الجنة لانو ماسجدش لأبيك آدم عليه السلاك،
هو لي بيدو كل شيء ا يكفي تتوضاي وتقولي الله اكبر تلقايه قدامك ، يسمعلك كل ما تقوليين ، ومتأكدة بلي يسمع ومهتم بما تقولين ، اشكي ابكي اهدري باي لهجة، فرغي قلبك ووالله ما ترجعي خائبة ، ولن يلومك ولن يعاتبك ان استغفرت غفر وان طلبت اعطى وان وان ... تلقايه عند حسن ظنك
كيفاش تنسايه وهو ماينساك؟
كيفاش تخلي ربي سبحانو وتروحي للناس ؟
اذا هدرتي ما سمعوك واذا سمعوك يتجاهلوك واذا ماتجاهلوك ينساوك واذ غلطت ماينساوش واذ طلبت ذلوك واذا درتي الخير ينساو واذا درت الشر يحاسبوك ... و اذا و اذا تلقايهم عند سوء ضنك
تخيلي ربي واش يقولك على الفاتحة في الصلاة : قسمتها بيني و بين عبدي نصفين !
لهذه الدرجة طلعت بينك يقسم ربي كلامو بينك و بينو؟
نتي تقولي بسم الله الرحمان الرحيم .... الحمد لله رب العالمين ،
وهو يقول ذكرني عبدي .. حمدني عبدي ،
ديجا غير تسمعي ربي جل جلاله يقولك عبدي طيري بالفرحة
يآآ أختي إذآ ربي قال
" ويل للمصلين اللذين هم عن صلآتهم سآهون" ..
هاذو راهم يصلوا و ربي توعدهم فمابالك بتارك الصلاة !
وأكثر ما يخيف يا اختي في هذه المسألة عذاب القبر
شوفي واش يصرالو من ينام فقط عن الصلاة المكتوبة فمابالك بتاارك الصلاة !
قال رسول الله صلى الله عليه وسلم : (أتينا على رجل مضطجع ، وإذا آخر قائم عليه بصخرة ، وإذا هو يهوي بالصخرة لرأسه فيثلغ رأسه - أي يشدخه - فيتدهده الحجر - أي يتدحرج - فيأخذه فلا يرجع إليه حتى يصبح رأسه كما كان ، ثم يعود عليه فيفعل به مثل ما فعل المرة الأولى ، فقلت : سبحان الله ! ما هذان ؟ فقال جبريل عليه السلام (إنه الرجل ينام عن الصلاة المكتوبة ) الله يستر
و عقاب تارك الصلاة نخليك نتي حوسي عليه بنفسك وشوفي ،
خاصة الفيديوهات تأثر فيك تهبلي !
علابالك كاين لي يبكو يموتو بالبكاء والحزن علابالك علاه ؟
ماعندهومش رجلين، ماعندهومش يدين مايقدرووش يسجدوو !!! حرموا من لذة السجود ووضع رؤوسهم على الارض
حرمواا من ذلك اللقاء الخااص
و نحكليلك هاذي صحابي من الصحابة ولا تابعي نسيت امره الطبيب بوجوب بتر ساقه لازم يقطعوه باش ماينتشرش المرض ،
قالولو بلي الامر مؤلم بزااف لازملك مخدر باش متحسش !!
تعرفي واش كان المخدر تاعو !؟ السجووود
قالهم خلوني حتى نصلي و نسجد لتماك ابترولي ساقي وفعلا ماحس بولا الم لانو كان مع الله فكرو كلو مع الله نفسو نساها ومانسي الله !
ااه يا اختي لوكان تجربي فعلا لذة الصلاة ،
تولي تبكي على الناس لي تركوها تتوسلي فيهم باش يصلوا و تخافي عليهم من عذاب الله
و تفكري
إبليس خرج من الجنة لانو رفض يسجد لأبيك "آدم" !
بالاكي تديري كيفو و تخلي نفسك والشيطان يمنعك من السجود لملك الملوك
الله لآآآ يحرمك من لذة الصلاة و لذة القرب منو،
ربي يهديك اختي و يغير حياتك للأفضل إن شاء الله