أم محمد تاج
السكالوب محشي هاو ليكم:
جيبي صدر دجاجة كامل وبواسطة الموس حاد شرحيهم بلا ماتقصي يعني أعملي كل جهة كالورقة وزيدي الجهة الاخرى تاع الصدر حطيهم لاصقين في بعضاهم فوق الألومينيوم لازم باه يساعدك في طي السكالوب ثم أبداي داوي السكالوب تاعك ذرذري عليه الملح وفلفل أسود ومبعد طبقة موطارد وطبقة مايوناز وشومبينيو مقطعين وشوي زيتون أخضر مقطع وكمية فرماج تغطي كل المقادير ثم من الفوق رشة زنجبيل ورشة فلفل أحمر حار وفي الأخير حطي باقات صغار تاع المعدنوس بلا ماتقطعيه وبالحيلة أبداي رولي السكالوب تاعك ماتخافيش إذا خرجلك شوي وجيبي خيط خشين وأبداي أربطي السكالوب مليح ولوحيه في كيس الشواء أحسن من الألومينيوم لأنو كيس الشواء راح يخرجلك العصارة مبعد تحلي فيها لاكرام فراش
حطي السكالوب ساعة يطيب مالازمش ينشف خليه يبرد ونحي العصارة ديريها في مقلة وديري عليها فنجال كرام فراش مع شوي ملح وفلفل اسود وشوي فرماج شيدار وتهز غلية فقط وتكون عندك صوص هايلة
من جهة أخرى ردي الصدر تاعك في الفور يحمار شوي برك ونحيه وخليه يبرد وقصيه وزينيه بلاكرام فراش تقدري تقدميها مع روز بالزعفران ولا بطاطا بوري ولا بطاطا مقلية ولا الشكل لي قدمتو
