السلام عليكم
و رجعت بنصائح بالنسبة للفيزياء هي كيما الرياضيات تبداو الدراسة من بداية العام مش كيما هدوك اللي يقولو يبقى 3 او 4 اشهر على الباك نبداو نحضرو صدقوني رايحين تندمو اشد الندم و تلقاو رواحكم روطار طول و تصيبكم كا~بة ربي يستر نشالله مكاننش منها
رايحين تتناولو حوالي 6 محاور اللي هي تطور نتائج المتفاعلات في جملة كيميائية و التحولات النووية اللي هو اسهل محور على الاطلاق و الظواهر الكهربائية هي ثاني شوي سهلة و مراقبة تطور جملة كيميائية نحو التوازن و مراقبة تطور جملة ميكانيكية بالنسبة ليا هدا المحور يعتمد على الحفظ يعني حفظ القوانين و تشكيل معادلات الى غير ذلك و اخيرا الاعمدة و الاسترة و اللي مجاتناش في الباك حنا الرياضي لا أعمدة و لا أسترة الحمد لله
بالنسبة للكيمياء سهلة جدا مع كتاب العميد في الكيمياء لا اعرف ان كان متواجدا في المدن الاخرى لكنه هو من اعداد استاذي ربي يخليه لينا مالقيتش صعوبة ابدا في الكيمياء مع هدا الكتاب بربي نشالله تتحصلوا على النقطة الكاملة في تمارين الكيمياء انا منيش رايحة نقلكم تكتفوا بهذا الكتاب لكن حاولوا تحلوا تمارين الكتاب المدرسي مع حلول قزوري اني نحطها من بعد .
اما الفيزياء رايحين تتناولوا النشاط الاشعاعي اسهل وحدة و ظلم نفسه اللي ميجيبش فيه النقط اما المكثفة و الوشيعة فيها شوي اجتهاد لازم تعرفوا انواع المعادلات المحتملة تجي كيجي داك الوقت نقلكم تبقى الميكانيك فيها الاقمار الاصطناعية ساهلة مرة يعني قاطو يمدولكم فيه بالسيف تجيب فيه النقط اما السقوط بانواعه فيه شوي اجتهاد بالنسبة للاسترة و الاعمدة داخلة في الكيمياء و كما قلت العميد صديقي الدائم في الكيمياء
كذلك لازم تديرو كراس صغير فيه الملخصات و انواع تشكيل المعادلات رايحين تحتاجوه في المراجعة الفعلية للبكالوريا
و اعتمدوا على حل اكبر عدد من التمارين فيزياء او رياضيات
ومش تحلوا برك و خلاص لازم تشفاو على هديك الطرائق لانو كل تمرين و طريقة حتى و تحلو 2 تمارين كل يوم و تكون صح فهمت و مقتنع خير من اللي تحل 10 و نت ماك فاهم والو
كما كنت ندير انا و صاحبتي كنا متفقين على جدول موحد هي كانت تحل اكثر مني صح لكن مع مرور الوقت رايحة تنسى و تضطر تعاود حل التمرين من جديد باش تفهم
و شكراً