راح نعطيلك الوصفة عزيزتي هي البقلاوة عادي والبنة هايلة بالنواد كوكو
بالنسبة للعجينة
5 كيلات فرينة
كيلة زبدة ذائبة
قرصة ملح
لمي بماء عادي مع شوي ماء زهر حتان تجيك عجينة طرية
قسميها ديريها كويرات وخليها ترتاح ساعة متحطيهاش في الثلاجة
ملاحظة: اذا حبيتي ديري عجينة الفيلو ( 4 كيلات فرينة + نصف كيلة زبدة ذائبة + ملح + ماء )
بالنسبة لحشوة النواد كوكو:
3 كيلات نواد كوكو + نكهة النواد كوكو تتباع في قراعي صغار كباقي النكهات ديري ملعقة كبيرة
كيلة سكر عادي
ماء زهر تلمي بيه الخليط ميكونش سائل يكوون شوي ثقيل
خلطي هاذ المكونات وحطيهم في وعاء والى الثلاجة خليهم ليلة كاملة وهاذا هو السر باش يذوب السكر ويتفاعل مع نكهة النواد كوكو
الان كي تبداي تخدمي
حضري عجينتك والحشوة
أفردي العجينة بالنشا يستحسن فردها بالمكينة اذا معندكش حليها بالحلال وتكون رقيييييييييقة كل ما تحطي طبقة العجينة ادهني زبدة ذائبة لازم تذهنيها ما بين الطبقات ديري 5 طبقات وحطي الحشوة هاذيك وزيدي كملي 5 طبقات عجين مع دهن الزبدة
كي تكملي أقسميها مع تزيينها كيما تحبي
الفرن لازم تشعليه بنصف ساعة قبل يكون سخون 150° النار لما تكون هادية تساعد العجينة على التوريق وحطي الصينية في الوسط وخليها طيب على راحتها حتان تحمار
من بعد كي تخرجيها عسليها وهي سخونة
انشاء الله نكون أفدتك وبالصحة والهناء