اسعد الله مسائكن حبيباتي
تطبيقي لنهار اليوم كان كالتالي
الجانب الديني "عذر شرعي" الاستماع للقران الكريم +اذكار الصباح و الاستيقاظ من النوم +الاستغفار
الجانب الجمالي كحل للعينين تمشيط الشعر وتزييته الفازلين للرجلين وتفريش الاسنان
الجانب التنظيفي
نضت كي العادة 4.15 عدلت الغرفة نتاعي و كنست الطابق الاول و فرزتو "تنضيف روتيني "
ومن بعد درت الفطور اللي كان خبز بالزبدة والمعجون +حليب+قهوة+تاي+بسكويت مقرمش
ومن بعد غسلت المواعن و سيقت الكوزينة و المراح والمراحيض والحمامات حشاكم
و من بعد رتبت الهول والصالة و بيت ماما و الغاراج
و كنست الحالة و عقبت نشافة على الطابق الارضي
الطابق الثاني راني مهملاتو خلاص من السمانة للسمانة نطلع ليه هو ولاتيراس نفرزهم ونضربلهم تسياقة "كل خميس ولا جمعة"
و من بعد وجدت الغدا اللي كان شربة خضرة +سلاطة+فلفل+مطلوع+جو تاع القارص
وغسلت الموعن اللي طاحو ورحت خدمت طقم من ليبول ماجيك لاختي تاع الحمام
و كي كملت رحت بديت في برنامج اليوم
عقمت كامل الاواني و الكيسان والمغارف ....الخ في بسينة كبيرة و زدتلها شوي جافيل و غسلت بايزيس بريل و خليتهم يقطلو و مسحتهم ورجعتهم لبلاصتهم
ومن بعد فرغت كل علب البهار وعلب البقوليات و العجائن "كيما المقارون والسباقيتي ....الخ" و غسلتهم ونشفتهم و عاودت مليتهم
يعني الكوزينة ذرك رهي تشعل هههه
و من بعد نقيت سطل القمامة حشاكم و درتلو صاشي اخرى و درت عليها شوي تاع صانيبو
اما سلة الخضار وسلة الاواني ماكانش لانو الخضار كامل نحطها في الثلاجة مام البصل و الثوم ديما نقيه و نكونجليه و الاواني في الخازانة
ماكانش صعيب لانو كلشي نضيف و نقي من بعد ما درت الخطبة فرزت كلشي و جاتني الحالة ذرك ساهلة
و من بعد حطيت الغدا و طلعت درت دوش خفيف و بدلت قشي
ومن بعد دوزنت المرقة تاع الشخشوخة و عجنت العجين وخليتو يرتاح لانو لعشية عندنا ضياف من تيبازة و شارطين ياكلو الشخشوخة المسيلية ههههه
ربي يعينا على ضيافتهم باحسن حال
هذا كان تطبيقي لليوم والحمد لله
تحياتي للجميع