السلام عليكم حبيباتي إن شاء الله راكم في أحسن حال لبارح عشايا كان قناويى لكن مصبرة حبيت نشاركم في طريقة تخضيرها علابالي بلي معروفة ماشي جديدة بصح كاين لي مايعرفهاش المهم استعملت المصبرة لانو ماشي وقتها الآن وسخفت عليها وزيد حتى كيتكون في وقتها تكون غالية المهم بدون اطالة اليكم المقاديروطريقة التحضير : بصلة متوسطة حبة طماطم متوسطة راس ثوم لحم او دجاج انا متوفرليش لحم ساعتها درتها بالدجاج لكن باللحم تجي إمممم أحسن من الدجاج المهم ... كمشة حمص وباطة قناوية تع كغ والتوابل ملح فلفل أحمر راس الحانوت نهرسوهم مع الثوم وننقطع البصلة والطماطم إلى مكعبات صغيرة ونحطهم مع اللحم والثوم ليهرسناه يتقلومع شوي زيت والماء راهو يغلي على جنب وبعد ما يتقلى وحد الخمس دقايق ديري شوي ماء على جنب وارمي الكمشة تع الحمص وغرف ونص طماطم مصبرة هاني نسيتها في المقادير زبدوها وحدكم هههههه تتقلى شوي ثاني مع الطماطم وإمباعد نكمل بقية الماء نمرقها حتى يتغطى اللحم وأكثر شوي نغطيها ونقص عليها النار وهاهي علبة القناوية نشلوها ونقطروها في كسكاس ونغطيها ونخليها إلى حين تشوفي المرقة خثرت وبدت اطلع في ايدامها واللحم والحمص تقريبا طابو نرمي لقناوية ونحرك ونغطيها ونخليها وحد ربع ساعة أخرى على نار هادئة حتى تاخذ طعم المرقة وتدخل في بعضها وتذوقي اذا خاصها ملح وطفي عليها ولوحيلها الحار وتقدم مزينة بالدبشة تفضلو مدو يديكم مزالت سخوووونة والى لقاء آخر في مواضيع أخرى لاتنسونا من دعيوة خيييييير