السلام عليكن اخواتي نقترح عليكم في هاد الموضوع طريقة تحضير لامونة بالكريمة الموجودة في المحلات والي بصراحة انا نخاف منها كثير خاصة للاطفال لانها سبب في التسممات نتيجة الكريمة الموجودة بها وكاين بعض المحلات سامحهم الله كي تصبح لهم ومتنتباعش يعاودو يحطو كريمة جديدة فوق الصابحة ويبيعوها وليت مختصة في الصحة والتغدية ومحاربة الغش ههههههههههههههههههههههه [IMG][/IMG] [IMG][/IMG] المهم باش تتفادي حبيبتي كل هادا نعطيك الحل في هاد الوصفة لامونة بالكريمة المقادير/ 2 كيسان ماء دافيء نصف كاس زيت ملعقة كبيرة ونص خمارة 2ملاعق حليب غبرة كاس سكر كيس خميرة ملعقة صغيرة فاني قرصة ملح فرينة حسب الحاجة التزيين/ مربى- سكر رطب طريقة تحضير الكريمة / كاس حليب بارد - ملعقتين مايزينة -3 ملاعق سكر ممكن اكثر دوقيها قبل حسب الرغبة حطيهم فوق النار وحركي حتى تتقل بعديها من فوق النار ومنين تبرد اضيفلها ملعقتين زبدة طرية وخلطي بالباتور واضيفي نكهة الفانيلا وتصبح جاهزة طريقة التحضير / نحط كل المكونات ماعدا الفرينة والخميرة نخلط مليح نضيف الفرينة والخميرة ونلمها بلا دليك ما لازمش تجي قاصحة تبقى مرخوفة وتلصق في اليد نخلوها ترتاح 10دقائق فقط نشكلوها كريات حسب الرغبة من بعد نقرصوها على شكل خبزة من الاحسن كبار تبان كي تاع برا كي تخمر نطيبوها من تحت ثم نشعلو من الفوق نفس طريقة الخبز كي تبرد نفتحوها في الوسط ونحشوها بالكريمة ثم نغلقوها للدهن من الفوق ملعقتين من المربى + ملعقتين ماء ساخن تدهن ثم ترش بالسكر رطب ملاحظة / 1- ممكن تحطي شوكولا من فوق بدل السكر وممكن تضيفي الشوكولا للكريمة 2- زيني حسب الحاجة يعني ادا تاكلي خبزة وحدة ديري الكريمة في وحدة و الاخرى ديريها في الثلاجة الخبزة في كيس واغلقي والكريمة في علبة مغلوقة وللغدوة ولا وقت ما تحبي خرجي الكريمة ضربيها بالباتور باش تطرى سخني الخبزة شوية في الفرن افتحيها وديريلها الكريمة المهم مش اكثر من 5 ايام نتمنى اني افدتكم بهاد الوصفة البسيطة وتنفعكم في يومياتكم مع المطبخ https://www.dzfile.com/do.php?img=408744