السلام عليكم اليوم جبتلم وصفة للكسرة الرخسيس جديدة وخفيفة تقول عليها قاطو سمعتها في الإذاعة جربتها وحبيتكم ديروها لأنها ساهلة وبنينة تتكل من الطاجين (انا عدلت فيها شوي) بسم الله نبداو المقادير : 3خبزات دقيق واللي تساوي كيلو دقيق بالتقريب مغرفة صغيرة خميرة فورية تاع الكسرة يعني ملح كأس إلا ربع زيت مغرفة أكل حليب غبرة جلجلانية أو سينوج حسب الرغبة مغرفة صغيرة عسل باكي خميرة تاع القاطو طريقة التحضير : ضعي الدقيق في قصعة + حليب الغبرة + الملح + الزيت + الجلجلانية و الخميرة تاع الكسرة + ملعقة العسل بلي بالماء الدافئ حتى تتحصلي على عجينة مليحة برك ماهيش جارية غطيها حطي طاجينك يسخن وعاودي ارجعي للعجينة تاعك حطي فوقها الباكي تاع خميرة القاطو و دخليها مليح في بعضاها ولوزيها وابداي حلي وطيبيها مباشرة على نار قوية ما تخليهاش تخمر مباشرة طيبيها و شهية طيبة. نتمنى تجربوها و كيما تقول عزيزتي حورية المطبخ اللي نحترمها بزاف هاد الكسرة ""صدقوني من أروع ما يكون"" الصور منقولة من الانترنت فقط لتتوضح لكم الرؤيا.