صدقوني يا إخوتي منين قريت بيان جديد من النقابة فرحت وقلت بدأت مرحلة التصحيح والمراجعة و الجماعة راهم حسو بالقاعدة التربوية ولا على الأقل جزء كبير منها لي راهي تطالب بضرورة مراجعة الاختلالات التنظيمية في النقابة وفتح نقاش جدي حول من يملك القرار الحقيقي في النقابة وماهي الآليات لكي نمنع أي انحراف من أي نوع ومن أي كان داخل مؤسسات النقابة و لكي نظمن حقوق العمال لكن للأسف جاء بيان النقابة الجديد لكي يكرس القرار الأحادي و سياسة الهروب إلى الأمام والتظاهر بأن الأمور طبيعية على جميع الأصعدة و ماكاين والو الحالة راهي مليحة و النقابة راهي قوية والقاعدة راهو عاجبها الحالة وووو...........
النقطة الأولى مافيهاش مشكل موقف الاتحاد في هذه النقطة ومعروف وأعلن في أكثر من بيان ومناسبة . يعني لا جديد.
النقطة الثانية مراهيش مفهومة وحنا على أبواب الامتحانات الرسمية أنا حبيت نفهم حاجة وحدة كيفاش الاحتجاج وماهي أدواته ؟ ولا راكم تصبرو فينا برك ؟ الكلمات المطاطية و العبارات القوية والقاعدة التربوية لي انتم قلتو ماهيش في المستوى كيفاش راكم تطلبو منها التعبئة وزيد واش رايح الدير هذي القاعدة التربوية الأن .ماهي الخطوات العملية .
النقطة الثالثة لا حدث لا تقدم ولا تأخر حنا كمعلمين وأساتذة لي يحب يجي يراقب مرحبا بيه ولي ما يحبش راهو حر خدمتنا نخدموها ونتمناو الناس لخرى تخدم خدمتها سواءا ممثلي العمال ولا الوزارة نتاع التربية
في الأخير نتمنى أن القاعدة التربوية تعرف بلي البيان هذا ما يزيد ما ينقص في الوضع لي وصلنا له وأننا ننتظر بيان يكون يحترم القاعدة التربوية ويعترف بالفشل – والاعتراف بالحق فضيلة – ويكون شجاع ويفتح الملفات الداخلية نتاع النقابة ويعالجها بحيث أن الممثل الجاي نتاع العمال يكون على دراية بالملفات والنقابة ماهيش بيانات النقابة عمل و مفاوضات ودراسات و ورشات و قرارت ثابتة مبنية على محاضر نتاع القاعدة . وإلى ذلك الحين سنظل نصرخ في وجه من يريد الاستئثار بالنقابة ويحصر القرار في يده ضاربا عرض الحائط لصرخات القاعدة التي تدعو إلى احترامها وتمثيلها بما يليق بها.